Pynbam smai ka Congress, ia ki kyrtong MLA ha ka kyrteng U Blei

Panaji: Ha shwa jong ka elekshon MLA ha Goa, ka Congress, ka don ia ka jingmut kaba kham pher ban teh kyndon ia ki kyrtong MLA jongka bad kata ka long ba lada ki jop, kim dei ban kyntiap seng.

Hynnin ka sngi, ki nongialam jong ka seng Congress, ki ialam da ka ki bos ia ki 34 ngut ki kyrtong jongki, ha kaba la ialam ia kitei ki kyrtong sha ka temple, sha ka iingmane kristan bad nangta sha ka dargah bad la phah ia ki, ba kin bam smai, ha ka kyrteng U Blei; ba kin nym phet seng satia ialade, lada jia ba ki jop ia ka elekshon MLA, na ka tiket jong katei ka seng, ha ka sien ialeh, ka ban sa long shen.

Katei ka la ai jingsneng kaba jur ia ka seng Congress, namar kiba bun ki MLA jongka, ki la phet noh na katei ka seng bad leit iasoh sha ka seng BJP. Ha ka elekshon MLA ha u snem 2017, ka Congress, ka don 17ngut ki MLA, ha ka iing kaba don 40ngut ki MLA, hynrei katei ka seng, ka don mynta tang 2ngut ki MLA. Ha u snem 2019, ki don 10ngut ki MLA jong ka seng Congress, ki leit pyniasoh ialade sha ka seng BJP bad mynta ka BJP, ka don 27ngut ki MLA ha ka iing dorbar ha Goa.