Pynbam ka MPFT ia ka Young Blood ha Mawten

Shillong: Ka kynhun ialehkai ki pulit ka Meghalaya ka Meghalaya Police Football Team (MPFT) ka la pynliem kput ia ka Young Blood Sports Club da 10 – 0 ha ka jingiakhun ka kwatar kaba ar jong ka V Mawten Invitation Football Tournament 2018-19 ba pyniaid ka Mawten Sports Club hapoh madan Mawpyllun Mini Stadium, Mawten.
Ha ka kylla step, ka MLP FT ka la thep haduh 3 – 0 kol bad ia kine ki kol la thep da u Ambrose Syngkli ha 7 minit, u Chesterfield Nongdhar ha ka 29 minit bad u Niwan O. Gatphoh ha ka 45+2 minit.
Ha ka kylla miet, ka MLP FT ka la thep sa 7 tylli ki kol ha kaba u Chesterfield Nongdhar ula thep ha ka 52, 79, 82 bad 90+1, katba ia kiwei la thep da u Khrawkupar Barim ha ka minit kaba 69, u Emeral Jyrwa ha ka minit kaba 80 bad na u Teiborlang Siangshai ha ka minit kaba 90+2 jong ka kylla miet.
Ia ka nam Man of the Match ha kane ka lympung la rah da u Chesterfield Nongdhar jong ka Meghalaya Police Football Team.