Pynat shadem, ki khar die madan ha shi lynter ka Iewduh

Shillong, 4 Nailar:
Ki nongdie madan khamtam ki bar jylla ki la sdang leh shlur biang mynta dang katto katne bnai ha Iewduh, ha kaba la iohi ba ki sdang ban sei biang la ki mar ki mata ban die lyngkrang harud surok kaba la pynkhap shoin ia ka lynti iaid kjat. La iohi ba kitei ki bar jylla kyn thup ki khar die shana, ki khar die jain ki la leh bym salia shuh bad ki la die pynat shadem khlem i don jingpyrwa eiei ha shi lynter ka surok iew maw long bad ka iewduh.
U nongthohkhubor u ba la iaid lynti na them Iew mawlong, u la iohi ba ki paidbah ki hap ban iaid pynrit ha ki lynti iaid kjat bad kumjuh ruh ha ki surok naba la pynwit palat da kitei ki nongdie madan. La iohi ba ki kynthei kiba bah khun shadien jong ki ki hap ban ia lymbub para briew tang kiar na kitei ki nongdie madan kiba shong pynwit lynti.
Haba ia kren bad u nongthohkhubor, ki ba bun ki riew paidbah kiba iaid lynti ha katei ka jaka ki la pynpaw ka jingsngewkhia kaba jur namar katei ka kyntur palat pud ki nongdie madan. Hynrei kaba kut ka jingiakren bad ki ka dei ba ki la long ba ym lah leh eiei ruh em lada ki bor ba dei peit ki leh kyllut.
Lah ban pynkynmaw ba shipor ki nongdie madan khamtam ki khar shana ki la rit mynsiem shi katdei ha ka por ba dang synshar ka ARPA ha KHADC, ka por ba long EM tnad khaii pateng u bah Latiplang Kharkongor naba katei ka tnad ka la leit ban khynra na ka por sha ka por ha ki thain ka Iewduh. Kiba bun ruh ki paidbah ki la kubur ba ha katei ka por ki khar die madan kim shym la shlan ban tur kumba ki long ha kine ki sngi, wat la ki die tuh makna, hynrei la ong pat ba ki khmat jong ki shad sha diang bad sha mon bad ka pynap lypa ban kham suk ka lum tiar lada jia ba wan ki pulit Enforcement ka KHADC . Hynrei mynta la ong ba ki die bad ka rwai ka siaw sahuh khlem jingsalia.