Pynap ka sorkar da ki CRPF namar ka SAG

Shillong, 03 Rymphang:
Ka jingbuh ka sorkar ia ka tnad ialehkai kynthup ka ophis jong u District Sports Officer (DSO) ka East Khasi Hills bad ka Directorate, ha JN Stadium, ha Polo, ka la pynsyllang ia ki briew kiba leit donkam ha kine ki ophis namar ka jingdon ka jingialehkai 12th South Asian Games (SAG), ha kaba la khang pyrshah ia ki briew ban rung leit donkam ha kine ki ophis.
Naduh khyrdop jingkhang kaba nakhmat duh shwa ban rung sha 1st Ground ka SSA, la pynieng da ki pulit CRPF ki bym iapei ban iakren iakhana bad bun kiba wan na nongkyndong ki la hap ban leit phai noh tang na ka khyrdop.
U nongthoh khubor u la leit donkam ha kine ki ophis la lap ba kine ki pulit CRPF kiba ap ha khyrdop, ki pan da ka Identity Card (ID) bad ki bym don ia ka, kin hap leit phai noh.
Ha kane ka sngi, la ioh ban iakren bad ar ngut ki briew ba thmu ban leit donkam ha ophis u DSO, kiba hap leit phai noh tang na khmat jingkhang namar ba kim don ka ID ban pyni ha kine ki pulit. “Ha ka jingshisha, la iakren ba ngi thmu ban leit donkam sha ophis u DSO hynrei kine ki pulit ap jingkhang kim shym la shah satia. Ngi la hap ban leit phai iing noh khlem longkam”, la ong kine ki riew rangbah na thain Pynursla.Haduh mynta, ki bor bor pyniaid kim shym la pynbna ne ai jingshai da kano ka ID ba lah ban pyni ia ki briew ba leit donkam ha ka ophis tnad ialehkai, ki bym don jingiadei eiei bad ka SAG.
Iwei I kong na Mawlai ba don u khun ba ju leit kilanmet bad ka kynhun Lajong football, I la ong ba u khun jong I ruh, ym shym la shah ban rung bad ki pan ID shwa hynrei dei tad hadien ba la wan iakren u coach jongka, ba la ioh ban rung.
Kawei pat ka khubor, ka iathuh ba da ki hajar tylli ki trok ki la ieng laiñ ha 7 mer Upper Shillong mynta ka miet baroh kitei ki trok la bat tang haduh Umdiengpun( Lad Elephant Falls). Ki trok kiba la ieng laiñ ha katei ka jaka ki dei kiba la wan na ki thaiñ Dawki-Sohra bad na ki thaiñ West Khasi Hills. La iohi ia ka jingkhapngiah surok kaba jur ha kaba ki kali rit kiba iaid sharum shaneng kitei ki surok (Sohra-Pynursla-Dawki) ki hap ban ap lain lang haduh ban da lut ki kali kiba hiar bad sa ioh lad sa ki kali kiba kiew ban iaid. La iohi ba ha katei ka surok bah la pynieng trok ha baroh ar liang surok bad ka jaka ba lait ka dei sa tang napdeng bad dei na katei ka daw ba ki kali rit ruh ki hap ban ap lain shuwa ba kin ioh lynti iaid. Lah ban kdew ba katei ka jingbat trok ha Upper Shillong ka dei shi bynta na ka jingpynbeit kali ki pulit namar ka jingpynkhreh ia ka jingialehkai jong ka South Asian Games hangne ha nongbah Shillong, ha kaba ki pulit ki la pynbeit ba yn ym shah rung trok hapoh nongbah Shillong shuwa ia ka 10 baje mynmiet.