Pynap ka HSPDP ban tangon ia u Bah Nongsiej bad Mawsor

Shillong, 29 Nohprah:
Ka HSPDP ka la pynap noh ban pyndon kam da u dieng tangon ia ar ngut ki MDC kynthup u Bah LG Nongsiej bad ia u Morningstar Mawsor watla ka jingbuh por ba kin weng na ka kynhun synshar People Democratic Forum (PDF) bad ban pan map hapoh shiphew sngi ka la dep kut.
Ha ka jingshisha, ka HSPDP ka la dep thmu ban pynngat da ka kyndon kaba tyngeh ia kine ar ngut hadien ba ki la leit ban ai ia ka jingkyrshan ia ka PDF hapoh ka jingialam u Bah Pynshngain N Syiem ha KHADC khlem da kynjoh ne ioh jingbit na ka party.
Haba iakren bad u nongialam ka HSPDP u Bah Witting Mawsor ha kane ka sngi Hatmajai, u la ong ba ka party haduh mynta kam pat kwah ban pynpaw ia kano kano kaba iadei bad ka jingiadei bad kine ki ar ngut ki MDC kiba ka seng ka la dep byrthen kham mynshwa ban ai da ka jingpynsaja kaba tyngeh.
“Ngim pat kwah ban pynpaw eiei halor kane ka kam ia mynta”, la ong u Bah Mawsor uba bynrap, ba ia mynta ka party ka dang don ha ka jingpyrkhat ia kane ka kam.
Katkum ba lah ban sngewthuh, ka party ka dang wad da kawei pat ka lynti ban pynpoi khubor sha kine ki ar ngut ki MDC ban poi sha ka jingiakren sngewthuh jingmut.
Na ka liang u Bah Mawsor u la ong ba ka party kam pat lah ban ong eiei namar ba ka jingiakren ka jingiatai ka dang iaid halor kane ka kam.
Watla um shym la kren beit halor kane, hynrei na ki dak ki shin, ka paw ba ka party ka kwah ban don ka jingiakren iapynbeit hapdeng kine ki ar ngut ki MDC da ka lynti ka jingiasngewthuh jingmut.
Ka jingkynrum kynram hapdeng ka HSPDP ka paw pen ryngkew hadien ba u Bah Nongsiej bad u Bah Mawsor ki la leit ban ai ia ka jingkyrshan ia ka PDF ha kine ki bnai ba la dep. Shwa ia kane, ka la mih ruh ka jingkynnoh na ka liang u President ka HSPDP u Bah Ardent M Basaiawmoit ba u Bah LG Nongsiej um shym la kyrshan khuid mynsiem ia u kyrtong ka party u Bah D Jyndiang ha ka elekshon shiteng samoi na Nongstoin.
Hynrei na ka liang ki nongkyrshan bad ki nongkitkam ka HSPDP Nongstoin ki la mih paidbah ban ai ia ka jingkyrshan ia u Bah Nongsiej ban pynrem jur ia ka jingkynnoh jong u President ka party.