Pyn syriem u heh Congress, ia ki Taliban, naba ki ia rah suloi AK ha Shillong

New Delhi:Ka seng Congress, ka pyn ia syriem halor ka jing rah tiar siat ki ehrang Taliban ha ki surok bah ha Kabul bad ka jing rah tiar siat, da ki suloi AK 47 ha Shillong, ha ki khyndiat sngi ba ladep.

U Randeep Singh Surjewala, uba dei u nongkren jong ka seng Congress, ula kynthoh myn hynnin ka sngi, ba ka jinglong jingman ha ka thain shatei lam mihngi, ha kine ki sngi, ka la poi sha ki kam pyntriem ba i shyrkhei bad kaba la long palat ia ki kyndon ka synshar khadar jong ka Ri.

U Surjewala, u ong “Ngi iohi ia ki jingjia kiba itriem ha Afghanistan, hynrei ia ki jingjia sha ka thain shatei lam mihngi, la buhrieh da ka sorkar. Haba ki Taliban, ki sei ia ki tiar siat jongki, ngi tip ba ka jingjia ka dei ha Afghanistan, hynrei ka mih sa kawei ka video, kaba pyni ia ki briew kiba deng mask bad kiba rah ia ki suloi AK 47 ha ki surok bah ha Shillong. Katei ka dei ka jing leh sting jong ka sorkar India”.

“Ka sorkar jong U Modi, ka leh mat lah halor ka jingjia sha ka thain shatei lam mihngi bad kane ka dei ka jingleh matlah bad ka jingrhah bor jong ka seng BJP” ula ong shuh.
U Randeep Singh Surjewala, u kren sngew khia ruh halor ka jingjia ha khappud ka Assam-Mizoram, halor ka jing ia siat ha ka 26tarik Naitung bad nangta ha ka 17tarik Nailar, ha kba u ong “Ka Assam bad ka Mizoram, ki leh kumba ki ia dei ki nongshun, hato u myntri kam poh iing, um don jing kitkhlieh?”

U Surjewala, ula ong shuh shuh “Ha ka sngi laitluid, la pyn jari da ka korphiw bad la khang ia ka internet, nangta ka kali jong U Lat, ruh ka shah lun maw, hynrei haei ka sorkar U Modi bad haei u don u myntri kam po iing?”
Nangta u Surjewala, u ong shuh ba ka soskular iasuk jong ka sorkar India, kaba la ia soi h aka 3tarik Nailar 2015, ka la kylla kam kai, namar ba ka NSCN – IM, ka la kyntait ban ithuh ia u ksiang jong ka sorkar India, ha kaba u ong ba ka soskular iasuk, kaba ka kwah ka NSCN – IM, ka dei kaba long sha palat ka riti synshar ri jong ka India bad ba ki nongialam Naga, ki la kren shai, ba kin nym iasoh satia bad ka India.