Pyn sangeh noh ka seng Congress, ia ka jing trei kam ka NSUI ha ka jylla

Shillong: Ha ka jingialang jong ka Congress Legislative Party (CLP) mynta ka sngi, ka la rai ban pynsangeh lut ia baroh ki shnat seng, kiba la pyniaid na Delhi.

Ha ba batai shai halor kane ka bynta na ka liang ka nongialam ka liang pyrshah ka Dr Ampareen Lyngdoh, ka la ong ba kin don na ki katto katne ki organisation kiba la pyniaid ka jingtrei kam na Delhi, yn hap ban khang shuwa ka jingtreikam jong ki.

Kane ka jingpynsangeh shuwa ia ka jingtrei kam jong ki, ka long na ka daw ka jingieh jyndat jong ki 12 ngut ki MLA.
“Kawei na ka organisation kaba ka Congress ka la shim ia ka rai ban pynsangeh shuwa ka long ka NSUI bad ban ioh jingbit ia kane ka rai jong ki, na ka liang ka Congress party ka la dep ban phah da ka jingthoh sha Delhi naduh ka 27 tarik u Naiwieng” ka la iathuh.
Ka Dr Lyngdoh ka la iathuh ruh ba ym tang ka NSUI, hynrei ngi la shim ruh ia ka rai ban pynsangeh shuwa ia kiwei ki organisation kiba la pyniaid na Delhi kum ka Sevadal, ka Mahila Congress ki ba lehse don napdeng jong ki, kiba thmu ban pynjot ia ka seng.