Shillong:U Myntri ka tnat Pynroi Sor ka sorkar jylla u Bah S. Dhar ha ka sngi Palei u la pyllait artylli ki kali ka Shillong Municipal Board kiba kyrteng ka Jatayu Litter Picking Machine bad ka Truck Mounted Road Sweeping Machine, hapoh ka jaka treikam ka Shillong Municipal Board.
Lah ban kdew ba da ka jingthmu ban pynduna ka jingpyn donkam ban ktah ïa ki ñuit da ki nongtrei ka municipal, ka Shillong Municipal Board ka la pynïoh ïa ka Litter Picking Machine na ki Green Asset na ka bynta ka jingthmu ban khat ïa ki ñiut bad ki jaboh jabaiñ ba la bret, khamtam na ki jaka bret ñiut ne open dump lyngba ka kor ka bor machine.
Ka jinglah ban lum da ka machine ïa ki ñiut ka long 1.5 cubic meter kaba long malu mala shi ton ka jaboh bad ïa katei ka machine la pynïoh lyngba ka jingbei tyngka na ka 14th Finance Commission Award ha ka dor kumba T. 41,20,481/-.
Ïa ka Truck Mounted Road Sweeping Machine, ka jinglum ñiut jong ka kan long ha ka jinglah kit kaba 1.4 cubic meter kaba long kumba malu mala shi ton ka jaboh jabaiñ.
Katei ka trok machine ka don kawei ka centre brushing sweeping system, artylli ki side brushing sweeping system, uwei u main broom uba ka jingïar ka long 2000 mm.
La ong ba ïa ka machine la pynïoh lyngba ka bei tyngka na ka Ministry of Housing and Urban Affairs hapoh ka North Eastern Region Urban Development Programme ha ka jinglut kaba T. 24,49,000/- lak.
Phi don ban ong eiei?