Shillong: Myn hynnin ka sngi u myntri ka tnat ka koit ka khiah ka jylla u bah A.L Hek u la plie paidbah ia ki dawai sait kti lane ki ‘Hand Sanitizers’ kiba la shna hi hapoh ka Directorate of Health Services (Research), Pasteur Institute kaba don hapoh Lawmali, Shillong haka jing ia don lang ka Secretary ka tnat ka koit ka khiah ka M. N. Nampui, u Medical Superintendent ka Ganesh Das MCH Hospital u Dr. N. Wanswett, u Director ka DHS u Dr. A. War lem bad ki ophisar ka tnat ka koit ka khiah ka jylla.
Haba kren bad ki lad pathai khubor u myntri ka tnat ka koit ka khiah u la ong ba kum ha kane ka por ba don ka jing pang ‘corona virus’ ka long kaba kongsan eh iaka sorkar ne iaki riew paidbah ban wad ki lad lynti naka bynta ban iakhun pyrshah ia u khniang COVID-19.
“Ka jing thmu ban shna iaki dawai ban iakhun pyrshah ka jing pur ka jing pang’corona virus’ kadei naka bynta ban sam sha baroh ki nong trei ka tnat ka koit ka khiah lem bad iaki riew paidbah kiba don hapdeng ka jing iakhun pyrshah ia u khniang COVID-19″ la bynrap u bah A.L Hek.
U bah A.L Hek u la iathuh ruh ba ka rukom ban shna ia u dawai ban sait kti lane ki ‘Hand Sanitizers’ kadei katkum bala btah ka WHO. Haka juh ka por u myntri ka tnat ka koit ka khiah ka jylla u la leit ruh ban jurip iaki jaka bala buh kyrpang naka bynta kito kiba shah ‘quanrantine’ hapoh ka Ganesh Das Hospital.
Phi don ban ong eiei?