Shillong 10 Nohprah: Ha kine kipor bad ki ia ba mynta ki nongthoh kot khasi ki ba na kylleng ki jaka ki la nangmih shibun ban pyni ia la kajong ka sap ka phong, ba kumno ban thoh kot bad ban pyllait paidbah ruh khnang ba ki khun ka bri u hynniewtrep kin ioh ban pule ia ka.
Mynta ka sngi baar ka 10 tarik Nohprah 2024, artylli kikot ba la thoh da u Dr. A Jellingstar Lymba ba la ai kyrteng “Ki dieng Tyndung (The goads) bad kawei pat kadei “Ka Hima ki tnaw ki sner- Fiction la pyllait paidbah da u Dr. R. M. Lyngdoh kum u kongsan ha kajuh kapor uba dei ruh u principal ka Synod College, Shillong, ha ka jingiadonlang kibki bahaiing hasem, nalor kiwei kiwei de.
Ia kane ka program pyllait paidbah ia kitei ki kot la pynlong ha Khasi National Dorbar Hall, Mawkhar bad hashwa ban sdang ia kane ka program la pynlong shwa ka jingduwai.
U Dr. A. Jellingstar Lymba uba dei u nongthoh jong kitei ki artylli kikot ula pynpaw ka jingsngewkmen ha ba ula ioh ban thoh bad pyllait ia kine ki ar tylli ki kot, ha ka ba kadei ka ba ula thrang naduh kipor ba mynshwa.
Ula ong, ba ka mynsiem ka shlei bad sngew kumban iam kmen ban iohi ba ki paralok baroh ki la iawan pynshngaiñ lem ha kane ka sngi ban pyllait ia kine kikot.
Kine ki artylli ki kot kidon shibun ia ka jingthew haba ngin pule bniah bha, bad kan lam shisha ia ka lynti lada ngi pule bad puson, haba ngi im ha kane ka sla jongka khyndew la bynrap u Dr. A Jellingstar Lymba. Nalor kata u la ong, ba da ka jingai mynsiem jong ka kurim, ki khun, haduh ki bahaiing hasem, ka la pynlong ia u ban nangioh mynsiem shuh shuh ban nangthoh bad pynmih ia kikot pule Khasi.
“Halor jong kitei ki artylli ki kot u Dr. A. Jellingstar Lymba ula iathuh, ba ki jinghikai ki ba don hapoh jong ka kot ba la ai kyrteng kakot “Ki dieng Tyndung” Kadei ka jingiathuh ia ki jingjia jong ka khlam covid, ka jingsniew bad ha kaba iadei bad ka imlang ka sahlang kumjuh, sa kawei de kakot ba la ai kyrteng “Ka Hima Ki Tnaw Ki Sner” pat ula iathuh, ba ula thoh ia kane kakot shaphang ki khñiang ki ba ju wan ban sah ha ki iing ki sem, ka ba la pynlong ia u ban thoh syndon da ka kot.
Nakaliang u Dr. R. M. Lyngdoh uba dei u kongsan ha kane ka sngi ha kajuh kapor u badei ruh u principal ka synod college, shillong ula ong, ba Kakot kadei ka jingnoh syniang ia ka mynta bad ia ka lashai. Ula ai ki kyntien ai mynsiem ia u bah Jellingstar Lymba uba dei u nongthoh ia kine ki artylli kikot uba la pynlutpor bad ban ngam jylliew ban thoh ia kikot namar kalong shisha ka ba eh.
“Ngi donkam ia ki nongkyrshan haba ngi trei ka kano kano ka kam bad khamtam eh naiing nasem, ba lada don ka jingkyrshan nyngkong na la iing ngi ju ioh mynsiem shibun”. Baroh ngi ia nang ia stad hynrei ban thoh kot pat ngim ju lah, kumta u la ong, ba ubah Jellingstar Lymba udon shisha ia ka sap ba u Blei ula ai bad ula kyntu, ba un pyndonkam hok ia kasap ka phong ka ba udon, la ong u Dr. R. M. Lyngdoh.
Ula ong ruh, ba kane kaia ba mynta ngi dangduna shibun ha kaba iadei bad ki nongthoh kot kumta ula wer ia baroh ki paidbah ka jylla ki ba don ka sap ban mih shakhmat ban pynmih lane thoh kot.
Ha ba pynkut ia kane ka jingkren u Dr. R. M. Lyngdoh u la kitbok kit rwiang ia ubah Jellingstar Lymba khamtam eh ia ki bahaiing hasem ki ba la synran bad ai mynsiem ia u, ban thoh kot bad ruh u ong, ba “Ngin nym dei ban klet ia u Thomas Jones uba dei u nonghikai uba la noh synniang ia ka ri Khasi bad Jaintia ban nangban thoh ban pule ia ki dak jingthoh Khasi”.
Phi don ban ong eiei?