Pyllait U CS barim, ka kot ki riew shlur Nepali ba thoh u ophisar barim

Shillong, 04 Risaw:
U Chief Secretary barim ka sorkar jylla uba dei ruh u Co-Chairman Meghalaya Resource and Employment Generation Council u bah WMS. Pariat ha kane ka sngi Saitjain u la pyllait ia ka kot “The Gorkhas in the freedom struggle of India” ba la thoh da u KK Muktan ha Hotel Polo Towers, Shillong ha ryngkat ka jingdonlang u Anil Pradhan u IPS ba shongthait, u HM Shang pliang u Director I&PR, ryngkat ka jingdonlang kiba haiing hasem.
Ha ka jingpyllait ia kane ka kot, u bah Pariat u la ai khublei ia une u nongthoh kot uba la lah ban thoh ia kane ka kot ban batai shaphang ka jing iarap jong ki Gorkhas ha ka jingiakhih laitluid.
U bah Pariat u la ong ba kane ka kot ka iarap ban ia jingtip sha phang ki Gorkha kumno ki don bynta ha ka Indian National Army ha ka jingiakhih laitluid.U la ong ba bun na ki briew kim tip shaphang ki Gorkha ne INA,  hynrei  mynta ka jingdon  kane ka kot kan iarap shibun eh ia briew khamtam ia ki nongthoh kot.
Shuh shuh u la ong ba ka jingdon jong kane ka kot kan iarap ia ki nongpule, ki khynnah skul bad khamtam ia ki nongthoh kot bad  bad kumjuh ia baroh.
Shwa ia kane la ioh ka jingkren maitphang halor kane ka kot na u Muktan uba dei u nongthoh ia kane ka kot, u la ong ba kane ka kot la phiah ha ki lai bynta. Ka bynta ba nyngkong ka dei shaphang ki shipai Gorkha kiba iasoh bad ka Indian National Army ban iakhih ban leh pyrshah ban ioh ia ka jinglaitluid.
Ka bynta ba ar, kadei shaphang ka jingshim bynta palat hajar ngut ki Gorkhas ha ka INA  hapoh ka jingialam jong u Netaji Subhas Chandra Bose ha ka thma bah ba ar ban pyllait ia ka India na ka jingshah synshar ha ki shipai phareng.
U la batai halor kumno kine ki Gorkhas ha India ki don bynta ha ka jingiakhih laitluid  pyrshah ia ki shipai British ha kaba ki la aiti ia ka jingim lade na bynta ban pynioh ia ka jinglailuid ia ka ri.
U la ong ba bun na ki Gorkhas India kiba iakhih ban pynioh ia ka jinglaitluid hapoh ka jingialam jong u Mahatma Gandhi kidei kiba shong basah ha Darjeeling, Calcutta, Benares, Dehra-dun bad ha ka jylla shaphang lamihngi.
Ha ka bynta ba lai jong kane ka kot, u Muktan u la ong ba ka dei shaphang ka thma kargil ha u snem 1999 ha kaba 22 ngut ki Gorkhas ki la duh ia ka jingim ha kane ka thma ban pyllait luid ia ka Kashmir na ki nong Pakistan.