Jowai: U Local MLA ka Jowai, u ma Wailadmiki Shylla mynta ka sngi Saitjain u la plie paidbah ia ka kali kit nongpang (Ambulance) kaba la pynioh jingiarap lyngba ka Chief Minister’s Relief Fund sha ka Khliehtyrshi PHC, West Jaintia Hills District.
Haba plie paidbah ia katei ka kali, la pynlong ia ka jingialang kaba lyngkot ia kaba la pyniaid da u Dr. S Dkhar uba dei u Medical Officer badei peit ia katei ka PHC.
U Dr. KC Ajar u la ai ka jingkren pdiang sngewbha ia kiba la shah kot sngewbha sha katei ka jingplie ia katei ka kali.
MDC ma Lakhon Dkhar la ïathuh ba ïa kane ka PHC la sdang ïa ka kum ka Sub Center naduh u 14 tarik u July snem 1986 bad la rai ban kyntiew kyrdan ia ka sha ka kyrdan PHC ha u snem 1997. U la ong ba ka jingdon kane ka PHC ka la ai jingiarap shibun ia ki paidbah kiba don sawdong jong ka shnong Khliehtyrshi.
Na ka liang u ma Wailadmiki Shylla kum u kongsan u la ai ka jingkhublei kaba kyrpang ia u Myntri Rangbah ka jylla u Conrad K Sangma uba la kloi ban iarap ia katei ka PHC da kane ka Ambulance. “Nga la ia kynduh ia u Myntri Rangbah tang shisien ban pynsngew ha u ia ka jingdonkam ban don ka Ambulance ha kane ka PHC bad u la kloi shisha ban iarap”, la ong u ma Shylla.
U ma Shylla u la pyntip ruh ba ha kaba iadei bad u surok uba jrong tang 4 km ban poi sha katei ka jaka ai jingsumar na Surok bah ba la ioh ia ka Sanction bad la khot ruh ia ki tender ban pyntrei noh ia ka khamtam haba la rang ka bneng.
Kiwei de kiba la ïadon lang ha katei ka prokam ki kynthup ïa u Rangbah Shnong ma K. Rymbai, MDC ba shusieh (Nominated) u ma O. Lamin, u MDC ka Jowai North u ma Brightstar Chyrmang bad u MDC ka Jowai South u ma Saron Pasweth bad u ma Ailad Bhoi MDC nalor ki nongtrei ka PHC, ki ASHA bad kiwei de.
Phi don ban ong eiei?