Nongstoiñ: Ka kynhun shna phlim na ki thaiñ Nongstoiñ kaba la tip ruh kum ka Silver Dew Nongstoiñ Channel mynta ka sngi kaba dei ka jingdap 3 snem jong ka kynhun ka la ïoh ban pynllait paidbah noh ïa ka phlim kyngkot ïa kaba kila ai kyrteng kum ka ‘San Hajar’.
Ïa kane ka phlim la thoh bad shna da u bah Friday Kharbani bad la ïoh ruh ban pyllait paidbah ruh da u tyngshop ba paw nam ka Ri Khasi Jaiñtia u bah Melvin Mukhim kum u kongsan ha ka jingialang kaba la long hapoh Vanni’s Hall Pyngdengrei.
U bah Lumlang Kharsyiemlieh, haba ai jingkren ha kane ka jingialang u la ai mynsiem ia kane ka kynhun shna phlim ba kan nang trei shitom shuh shuh ban wanrah ia ki phlim kiba itynnad bad kiba la iahap kyrdan ruh katkum kane ka juk kaba mynta.
Shuh shuh u la ong ruh ba kiba don sap kidei ban trei shitom ban nym pynsepei iala ka jong ka sap bad ha kajuh kapor pat u la kyntu ia ki bym don sap ba kimdei ban pynbor ialade ban don ha kata ka bynta hynrei kidei ban kyntiew bad ai mynsiem ia kiwei.
Katba n aka liang jong u kongsan haba ai jingkren u la ong ba ka kam shna bad pynmih phlim ha kane ka juk kaba mynta kala kiew stet bad kila bun bha hynrei dei ban kynmaw tang kawei ba ym dei ban iahun ne iabeh ia ka jingbun ki nongpeit hynrei dei ban pynbit pynbiang ruh ia ka rukom shna naduh ki story line ki rukom ak bad kiwei kiwei de.
Shuh shuh u kongsan u la kyntu ruh ba ki nongshna bad pynmih phlim ki dei ban shan ia ki phlim ki ban ai jingmyntoi ia ki nongpeit kai bad khamtam ka phlim kaba ki shna kadei ban don ia ka jingmut bad ka nuksa na ka bynta ki nongpeitkai.
Ha kane ka sngi na ka liang jong u kongsan u la khap ruh ia u ribbon ban pyllait ia ka poster jong ka phlim bad ot ruh ia u cake ban rakhe ia ka jingdap 3 snem jong ka Silver Dew Nongstoiñ.
Nalor u kongsan ha kane ka jingïalang la ïadon ryngkat lang ruh u bah O. Marthong uba la long kum u symbud kongsan, u bah Lumlang Kharsyiemlieh President ka HYC WKH, u bah J. Lyngkhoi Cheif Organiser FKJGP WKH, ki tyngshop ki puron ka Silver Dew bad kiwei kiwei.
Phi don ban ong eiei?