Pyllait paidbah ka BJP ia ka Manifesto jong ka ilekshon ha KHADC, JHADC, ryngkat ka kular tulop ia ki khlieh nongsynshar

Shillong 27 K’Lyngkot: Ka Bharatiya Janata Party-Meghalaya Pradesh, mynta ka sngi Nyngkong, ka 27 tarik u Kyllalyngkot 2025, kala pyllait paidbah ia ka Manifesto jong ka ilekshon ha Khasi Hills Autonomous District Council (KHADC) bad ha Jaiñtia Hills Autonomous District Council  (JHADC), ka ban long ha ka 21 tarik u bnai Rymphang.

Ia kane ka manifesto la ioh ban pyllait paidbah da u President ka Party u Rikman G. Momin,ha ka ba ka party BJP kala kular ba lada ka wan ha ka bor, kan pynioh noh da ka tulop ia ki Khlieh Nongsynshar kynthup ki Sordar bad ki Rangbah Shnong.

Ka party BJP Kala kular ruh ban sam jingiarap pisa ba T.2000 shibnai ia kiba bylla sngi kum ki Nongtrei kynta, nongniah taxi, kiba khlad lok, ki longkmie ba kyrshan dalade, ka kan pyntreikam daki Dorbar Shnong.

“Namar ka jinghiar palat ka khajna na ka kam khaii dewiong, ka BJP kala kular ba kan sdang noh ia ka kam tih dewiong kat kum ka jingbthah jong ka Iingkashari Supreme Court ban pynkiew ia ka jingiohnong jong ka Council”.

Kawei pat ka mad,ba ka BJP ka la buh, ka ba ong “Sarong ia la ka jong kan long kawei na ki lad ban kyntiew ia ka kam ingoh kai bad ban kyntiew ia ka kolshor jong ka jylla” ka dei kawei na ki mat elekshon jong ka BJP nalor ka jingpynkhlain ia ka jingai jingsumar dawai kynbat ha ryngkat ka jingiatreilang bad ka AYUSH Ministry.

Haba kular ban thung ia ka Committee ka ban khmih bniah ia ka jingpyntreikam ia ki skhim paidbah hapoh ki District Council, ka BJP kala kular ba “ka District Council kan pynmih ia ka Tnad ka ban khmih bniah halor ka jingbei tyngka na ka bynta ban sengkam ki samla trai ri bala nang la stad ha ryngkat ka jingiatreilang bad ki Syiem, ki Dalloi bad ki Dorbar Shnong.

Halor ka jingpynkylla ia ka Sixth Schedule, ka BJP kala pynpaw ba kan buddien ia ka jingpynkylla khnang ban pynkiew ia ki MDC ba shut hung hapoh 6 bnai bad ka Party ka daw aba uwei u MDC ba shut hung u dei ban dei uwei u Syiem ha KHADC bad uwei u Dallloi ha JHADC.

Ka BJP kala kular ruh ba kan wanrah da ki buit thymmai ban pynseisoh ia ki jaboh jabain kiba mih na man ki Hima bad Elaka bad ban ai jingiarap beit beit naka Council ban thied ia ki kor ki bor ban pynsaphret ia ki niut bad ruh ka BJP kala kular ba kan wanrah ia ka rukom thungkam kaba khuid hapoh ki District Council.