Pyllait kot U Bah Samiam

Shillong, 03 Naiwieng :
U Bah K.Kynpham D Samiam, uba dei uwei na ki nongthoh artikel niam mynta ka sngi u la pynmih pyrthei ia ka kot kaba u ai kyrteng “Nga La Shem ia U”. Ia katei ka kot la pyllait paitbah da u Rev P Hynniewta, uba dei uwei na ki Pastor Rangbah jong ka KJP Synod Sepngi. La ioh ban pynlong ia katei ka prokram kaba shongkhia shibun eh ha iing jong ka Shella Presbytery, kaba don ha Mawkhar Shillong.Haba kren kum u Kongsan  u Pastor Hynniewta u la pynpaw ba u dap da ka jingkmen kaba khraw haba U Blei U la plie ia u ka lad ban ioh pyllait ia katei ka Kot kaba kordor kaba U Bah Kynpham u la pynmih pyrthei ba kan sah pateng pakit ha ka histori ka thoh ka pule..U Kongsan u la pynpaw ruh ka jingsngew nguh ia u nongthoh, uba la trei ni bad uba la lah ban wan rah ia kiei  kiei kiba U Blei U leh ha ka rukom thoh kaba shai bha.Kumjuh u kongsan u la ai ka jingkhublei bad kitbok kit rwiang ia u nongthoh ba un nang lah ban noh synniang lem ha ka thoh ka tar la ka long ha ki kot niam ne kiwei.
Shuh shuh u Kongsan u ai ka jingkitbok bad ka jingduwai ba kyrpang na ka bynta kawei ka shakri jong u Blei ka Kong Shembhalang Samiam kaba la long ka shakri kaba U Blei U khot kyrpang ha ka Ribaibal jong u snem 1995 na ka Balang Presbyterian Nongshken.Lah ban pynkynmaw hangne ba ha katei ka kot la thoh shaphang ka histori ka jingtrei bad ka jingialam jong U Mynsiem U Blei ia ka Kong Shembhalang Samiam, naduh u snem 1995. Kiwei pat kiba kren ha katei ka jingialang ki long u Nongthoh, uba la wanrah ia ki daw bad ki jingthmu kiba la pynlong ia u ban sei bad ban tyngkai noh ia ki kam kiba khraw jong U Blei kiba dang jia haduh mynta.U Nongthoh u pynpaw ba u kwah ban tyngkai ia kitei ha ka almari ka thoh ka pule jong ka khasi lieterature.Nalor u nongthoh, la ioh ruh ka jingkren na i Tbn B Swet Jones Rapmai,Tbn P.D Wanbah, Mr R.M Khongjee.La pyniaid ia ka jingialang da i Tbn C.M Syiem  jong ka Balang Presbyterian Umlyngka.La pynwai ia ka  jingialang da ka jingduwai i Rev A.I Kharshiing Ka prokram ka long kaba i phuh i phieng bad kaba jop.