Jowai: Ka kynhun ki pulit na Jowai hapoh ka jingialam u SI. BC Shadap ki la ioh ban pyllait im ia u khynnah ba dang 7 snem ka rta uba shah rahbor sha Assam ha la u jong u kpa-nah uba dei ruh u ‘Khar Muslim ia uba la ioh lait ban phet rieh na kti ki Pulit.
Utei u khynnah uba la ioh wanrah myn hynnin ka sngi sha Jowai da ki Pulit ka West Jaintia Hills, la tip kyrteng kum u Aryan Lyngdoh, uba dei u khun jong ka kong Aisi Lyngdoh kaba naka shnong Nartiang – Iongshiwiat.
Utei ‘Pa-nah udei uba la tip kyrteng kum u Salammad Ali na ka shnong Laba Basti kaba hap hapoh ka Banskari Police Investigation Centre (PIC).
U Aryan Lyngdoh udei uba leit skul ha Vallabhai Patel LP School Iawmusiang, Jowai kaba don hajan ka SBI, Jowai Branch bad la iathuh ba utei u ‘Pa-Nah u la wan ban rahbor ia u na katei ka skul hi ha ka 18 tarik une u bnai ha shwa ba un rung shapoh skul.
Hadien ba la wan ialam ia utei u khynnah sha Jowai, la phah leh eksamin ia u ha ki Doctor bad hadien ba la lap ba u biang, u koit u khiah la aiti ia u sha la ka kmie.
Phi don ban ong eiei?