Pyllait ka Sorkar Pdeng ïa ka song ba T. 41 klur tam ka Scholarship

Shillong:Ka Sorkar India ka la pyllait ïa ka instalment kaba ar jong ka Post Matric Scholarship ba kot T. 41 klur tam, ban sam sha ki samla pule Scheduled Tribe ka Jylla Meghalaya na ka bynta u snem 2022-2023.
Ïa ka order ban mang bad pyllait ïa kane ka grant-in-aid ban ai scholarship, la pyllait mynta ka sngi Thohdieng ka 12 tarik Kyllalyngkot 2024 da ka Ministry of Tribal Affairs (Scholarship Division).

Ka shithi, ka copy ba la ïoh ka dei kaba la phah sha ka Pay & Account Officer jong ka Ministry of Tribal Affairs.
Ka song pisa ba la pyllait baroh ka long T. 41,25,00,000.
Hynrei, la sngewthuh ba kane ka pisa kam pat poi satia sha ka Account jong ka Sorkar Meghalaya, kaba lah ban shimpor sa katto katne sngi. Hynrei da kane ka jingpyllait ïa ka pisa, ka shong satang katto katne sngi ba ki samla pule kin ïoh pdiang ïa ka pisa ha ki bank account jong ki.

Hadien ka jingïoh pdiang ïa ka shithi na ka Sorkar Pdeng bala pyllait ïa ka song pisa, u Myntri ka Tnad Pule Puthi Rakkam A Sangma ula ong ba ka Sorkar kan pyrshang ban pynïaid wut wut ïa ki kam khnang ba ki samla pule kin ïoh noh ïa ka pisa scholarship ha ka taïew ban wan.

U Myntri ula ban jur ruh ba ka Sorkar Jylla ka la kut jingmut ban weng ïa baroh ki jingeh jong ki samla pule bad ban ïai tynruh ïa ka Sorkar Pdeng na ka bynta ka jong ki. Ula kyrpad ïa ki samla pule ba kin pyndonkam bha ïa ka scholarship.