Nongstoiñ: Kawei ka longkmie kaba la tip kyrteng kum ka Dmestibon Lyngdoh Marshillong 38 snem ka arta kaba shong ba sah hapoh ka shnong Tiehsaw Nongstoiñ West Khasi Hills District, ka la lait thaw na ka jingiap hadien ba u wei u samla u ba shlur u la ioh ban pyllait im noh ia katei ka longkmie, ha ka por ba kala shah bat ha u sainar jong ka bor ding ilektrik kaba dei ruh ka lain heh.
Katei ka jingjia ka la jia ha ka 15 tarik mynta u bnai ha kapor kumba 12 baje eiei ha kawei ka iing kaba don marjan ka Bishop Hall hapoh ka shnong Tiehsaw bad katkum ka jingiathuh kiba la sakhi ia katei ka jingjia, ki la ong ba ha katei ka sngi ka la don ka jingkhawai Iathoh ha katei ka Iing bad kyndit kynsan kynsan ki shu ioh sngew ia ka jinglynniar na sha jrong terrace jong katei ka Iing bad iohi ba katei ka longkmie ka la snoh ha u sainar jong ka bor ding ilektrik.
Shuh shuh ki la iathuh ruh ba ki paidbah, ki la shu iaboi ha katei ka jaka khlem nang shuh ban leh ei ei namar ka terrace ba shah bat ding ilektrik katei ka longkmie, ka la dap um ha madan hynrei rei kyndit kynsan kynsan la wan mih u wei u samla u ba shlur u bala tip kyrteng kum u Wiandarning Nongsiej 27 snem ka arta u ba trei ruh ha kawei ka karkhana shna Kali kaba don marjan bad katei ka Iing ha kaba u la shim da u wei u siej bala iap bad u la kiew ha jrong terrace bad bom ia u sainar ding ilektrik bad pyllait im ruh ia katei ka longkmie.
Na ka liang jong u nongthoh khubor u la iohlad ruh ban iakren bad katei ka longkmie kaba la shah bat ding ilektrik ha kaba kala iathuh ba ha katei ka sngi kala treikam ha katei ka Iing ba ka leit bylla bad kala khlieng jingkhlieng ruh sha jrong terrace jong katei ka Iing bad kala ong ba ruh ba kala pynkhuid ia ki jakhlia ba lang ha ka thliew ban pyntuid um namar ka um kam lait shun bad ha mar syndah jong katei ka Iing la don saw tylli ki sainar ding ilektrik kiba iaid lyngba bad katba ka dang bret ia ki jakhlia kumno re kumno ka kti jong ka kala kum tyngkhuh ha u tei u sainar bad hadien katto katne por kam tip briew shuh tad ynda la poi ha Civil Hospital Nongstoiñ.
U nongthoh khubor u la iohlad ruh ban iakren bad u samla Wiandarning Nongsiej u ba dei ruh u riew shlur u bala pyllait im ia katei ka longkmie u bala iathuh da kaba u la ong “Katba nga dang trei hapoh ka karkhana nga la ioh sngew ia ka jingiaiam briew bad nga la wan peit lem hynrei nga la iohi ba iwei I kong i la snoh ha u sainar ding ilektrik bad baroh ki briew kila shu iapeit khlem bang shuh ban iarap ne ban leh eiei bad ha kaba nyngkong nga ruh nga tieng namar nga la ima bad nga la peit sharum shaneng bad nga la iohi ia u wei u siej thadjain bad nga la shim bad mut tied na shapoh hynrei u tei u siej um kot satia shajrong kumta nga la kiew shajrong terrace ban kham suk bad nga la tied lang da u siej na ka kti jong i kong kaba bat ia u sainar bad mar kumta hi ka la lait bad mar ialait ka kti I kong i la khreh ban hap noh shapoh bad nga la ioh bat noh na ka kjat bad kumta hi nga la pan jingiarap lem bad ki briew ki la wan ban iatan lang”.
Shuh shuh u tei u samla riew shlur u la ai ka jingsngewnguh ia u Trai Kynrad u ba la don ryngkat bad u ban ioh pyllait im ia katei ka longkmie bad u la ong ruh ba donbok ba ha kapor ba u mut ban tied nyngkong ia u sainar ding ilektrik na shapoh u khlem kot u siej bad leit dei ba kot katei ka longkmie kala Shu hap beit na jrong shapoh bad lehse ka lah ban jia pynban ka jingjia kaba kham sngewsih.
Katei ka longkmie mynta ka la nang kham ioh bor bad ha ka sngi nyngkong mynta ka taiew ka la ioh ban mih noh na Civil Hospital Nongstoiñ bad mynta kala don hala ka jong ka Iing.