Pyllait im ki pulit ia ki 10 ngut, kiba sah kut ha jaka rep

Shillong: Ka jingther u slap ba jur ha ki bynta jong ka West Jaintia Hills District, ka la pynlong ia ka jing kiew jong ki wah kiba don ha ka thain.

Mynta ka sngi 10 ngut ki briew kiba sah ha ki jaka rep ka ba don ha  Sahbesain West Jaintia Hills, ki la sahkut ha kane ka jaka hadien ba ka um kaba heh ka la kiew kynsan bad kerkut sawdong ha kane ka jaka.

   Na ka liang u  Deputy Commissioner jong ka West Jiantia Hills District u bah Garod LNS Dykes u la iathuh ba hadien ka jingioh jingtip, ia kane ka jingsah kut kine ki 10 ngut ki nongrep ha kane ka jaka u la phah ia ki pulit jong ka 3rd MLP Battalion ban pyllait ia kine ki briew.

   Na ka liang jong ki pulit ka 3rd MLP Battalion, ki la shna ia ki bull (Raft) da ki siej bad leit sha ka jaka ba sahkut kine ki 10 ngut ki briew bad da kaba pyndon kam ia ki bull(Raft) ki la ioh ban pyllait im ia kine ki briew baroh shiphew ngut.

   U Deputy Commissioner ka WJHD, u la iathuh ruh ba ha kane ka jingshah lynshop u slap mynta ka sngi haduh mynta ka  jan miet kam shym la don kano kano ka jingjia ba sngewsih.

    Mynta ka sngi ka West Jaintia Hills District, ka la mad ia ki ba bun ki jingjulor na ka jingther u slap ha ka ba ka la wanrah ia ka jingtwa ka khyndew bad ki maw ha ki surok bad ka jingjulor ki ing ki sem na ka jingtwa ka khyndew bad ka jingshlei ka um.