Pyllait im 3ngut shi para, ia ki 2ngut ha Umngot

Jowai, 20 Nohprah:
Na ka liang ka bor shnong ka pynpaw ia ka jingsngewlem sha kiba haiing hasem jong u Phukan u khun ka Myntri Assam halor jingjia iap jyllop jong u ha wah Umngot ha katei ka shnong ha kane ka sngi step Saitjain.
La iathuh ruh ba ka dorbar shnong ka la shong jingialang kyrkieh ha ka miet sngi U Blei ban ia phylliew jingmut halor katei ka jingjia bad ruh ban pynpaw ia ka jing sngewlem sha kiba haiing hasem uba la duh ia ka jingim kaba kordor Ha kawei pat ka liang, ki lai ngut ki samla kynthei kiba pyllait im ia ki arngut ki briew kata u Rishabh Goswami bad ia ka Abigail Kharbithai hadien ba u paralok jong ki u Ritu Raj Phukan uba dei u khun ka Myntri barim ka sorkar Assam, ka Pranati Phukan u la ngam jyllong ki dei lai ngut shi para, ki kynthei riewshlur kiba la tip kyrteng kum ka Nikel Syngkrem 25 snem, ka Kynshon Syngkrem 18 snem bad ka samla lud Crusade Syngkrem kaba dang 17 snem ka rta.
Ki rangbah nongialam katei ka shnong ki la iathuh ba kitei ki lai ngut ki thei samla ki la mih na iing dang 4 baje lane duna eiei na iing ban leit sha khlaw ban leit jied kwai ba hap na ki dieng kwai.
Ki paidbah hi katei ka shnong ki pyndonkam beit da ki lieng kynda ban leit trei leit ktah naduh ki kynthei wat ki khynnah rit ruh ki triem bha ban king lieng. U Secretary ka VDP, u bah Ialam Syngkrem u la iathuh ba dei ha ka por 5:30 am eiei katba kidei ki lai ngut ki kynthei ki dang wan phai na kaba jied kwai na sha khlaw- ki wan phai da ki lieng bad ki la lap ia kitei ki ar ngut kiba dang iasnoh bad iasdien ha ka lieng kaba la kylla lyndet mar mar ki la king ia ki lieng shaba don maki ban pyllait im ia ki. Na ka liang ka Dorbar shnong ka la ai ka jingiaroh ia kitei ki lai ngut ki samla kynthei kiba la leh ia ka kam kaba dei kaba khraw. Shuh shuh ki paidbah ka shnong Pdeng ki la pynpaw ruh ka jingsngewngu ia u Blei halor ka jinglait im ki ar ngut ki khynnah uwei 12 snem bad uwei pat 13 snem kiba king ia ka lieng ha ka por ba utei u Phukan u hap na jrong lieng “Ngim lah mutdur kumno kitei ki khynnah ki lah ban jngi sha shi liang, hooid ki khynnah baroh kynthei bad shynrang ki nangban jngi hynrei ngim poi pyrkhat pat ba kin lah ban pyllait im ia lade ha katei ka jaka kaba jia katei ka jingjia”, la ong u B. Syngkrem, Rangbah shnong katei ka shnong. Na ka liang ka bor shnong ka pynpaw ruh ka jingsngewlem sha kiba haiing hasem jong u Phukan halor katei ka jingjia ba sngewsih.