Pyllait ia baroh kawei ka jylla, na ka CAA, dawa ki lai seng

Shillong:Lai tylli ki sengbhalang ba kynthup ia ka Hynniewtrep Youth Council, ka Jaintia National Conference bad ka Confederation of Ri-Bhoi People, ki la dawa ba ka sorkar ka dei ban pyllait lut baroh ia ka jylla Meghalaya na ka Citizenship Amendment Act 2019.

Haba kren sha ki lad pathai khubor, u President ka HYC u bah Roykupar Synrem u la ong ba kan jia aiu lada katto katne hajar ki wan ban ha ka normal Shillong.
Ka CAA ka la ailad ia ki briew kiba dei Khristan, Hindu, Jain, Parsi, bad Buddhist kiba na Bangladesh, Pakistan bad Afghanistan kiba wan shwa ka 31 tarik Nohprah 2014 ban wan sah ha ka ri India.

U bah Roykupar ula buh jingkylli, hato ka sorkar ka don jingkhein katno ngut kiba sah ha Normal Shillong. Watla u Myntri Rangbah u la ong ba ym dei ban tieng ia ka CAA namar ba kam ktah ia ka Meghalaya hynrei lada jia uwei ne ar ngut ne shiphew hajar ngut kiba pan ban wan sah ha Shillong Normal Area kaba khot ka European Ward, kaei ka sienjam ba ka sorkar kan leh.
“Ngi la iohi ia ka jingkren u Myntri Rangbah u Conrad K Sangma ba ym baroh ka jylla ka lait na ka jingpyntreikam ia ka CAA, khamtam ha ka jaka kaba hap ha Normal Shillong Area’. Lada tang shiphew hajar kin wan ban sah ha ka Normal Shillong Area, kan jia aiu ia ka jaitbynriew jong ngi”, u la ong bah Roykupar.

U la ong ba hato ka sorkar ka don jingtip katno ngut kiba sah ha Shillong Normal Area kiba sah shwa ka 2014 namar bai oh don kiba dang shu wan hynnin ruh kin wan sah ha katei ka jaka.
“Katno ngut ki briew kiba sah ha Normal Shillong Area ki lah ban aplai ia ka jinglong nongshong shnong lyngba ka CAA”, la ong u President ka HYC.

Kawei pat ka jingeh ka long ba ka jingma ia ka jaitbynriew namar ba lada wan tuid na kiwei ki jylla sha kane ka jylla. U la ong ba ka jingma kaban sa mih ka dei ka jingwan rung ki briew kiba wan na kiwei ki jylla bad ban iada ia ka jylla, ka donkam ban pyllait noh pura ia ka jylla na ka CAA bad ban iasaid tyngeh ba ka sorkar India ka dei ban ai noh ia ka Inner Line Permit (ILP) namar ba dei tang da kane ka ain, kaba lah ban iada ia ka CAA.
Ia ka jingthoh halor kine ki jingdawa, kine ki lai seng kila aiti ruh ha u Myntri Rangbah u Conrad K Sangma bad kila rai ruh ba kin buddien ia kine ki mat.