Pyllait dohkha ha Wah Khri

Shillong, 6 Nohprah:
Ka Hynniewtrep Achik National Movement Nongkhlaw Circle mynta ka sngi ka la pyllait ia ki dohkha ha katei ka wah haduh 5 quintal.
Ha kane ka sngi ki paidbah kane ka thain ki la ioh jingmyntoi haba u bah KL Nongum President HANM Nongkhlaw Circle, bah Bobby Basaiawmoit President HANM North West Khasi Hills, u bah P Thongni President FKJGP Langrin, u President ka HANM Sengkmie u bah Lamphrang Kharbani, u Fishery Officer Mairang Civil Sub Division u bah PS Tariang, ki la ai jingbatai ia ka jingdonkam ban pynneh ia ki dohwah dohum ryngkat bad ka pynsngewthuh ia ki paidbah ba ym dei ban pyniap pathar ia ki dohkha dohum da kaba kawang bom ne wieh dawai.
Ki sordar shnong ryngkat bad ki nongialam ka HANM bad ka tnad Fishery ki la shim ia ka rai ba kin dain kuna T.10,000 lada lap ia kino kino kiba shoh doh ha katei ka wah.
U bah L Kharbani haba kren kum u kongsan ula ong ba dei ban sumar bad iada ia ki dohum khnang ba kan long ka jingmyntoi ia ki paidbah kiba sah hajan kane ka wah namar ba ka jylla Meghalaya ka bam ia ka dohkha kaba wan na shabar bad ka long kaba kongsan ban pynroi ia ka dohkha na kane ka jylla hi khnang ba ki paidbah kin nym donkam ban ap khmih lynti shuh na kiwei pat ki jylla ban iohbam ia ka dohkha.
Ula ong ruh ba dei ban kiar na ka kawang bom, ber bih dawai ia ki dohkha dohum hynrei dei ban ri ban sumar bad tyngkai ia ki dohum bad ia ka mariang kumba u Blei ula pynkhamti ha ia ki paidbah kane ka jylla.
Hadien ba la wai ka jingialang kine ki nongialam ki la pyllait hapoh Wah Khri 5 quintal ki dohkha ki bapher bapher ha ryngkat ka jingiadonlang ki paidbah kane ka thain.