“Pyllait Aadhaar ia ki samla Ph.D”

Shillong, 6 Nailur:
Ka Khasi Student Union (KSU) ka la dawa ia ka sorkar jylla ba kan tuklar khnang ban pyllait ia ki samla pule Ph.D ne ki Research Scholar na u Aadhaar Nombar na ka bynta ban ioh ia ki Fellowship bapher bapher.Katei ka jingdawa ka KSU ka dei hadien ba ka University Grants Commission (UGC) ka la pynmih ia ka jingpynbna kaba salonsar na bynta ki Ph.D Scholar ba ki dei ban suhlang bad u Aadhaar nombar ha ka por ba ioh ia ka Junior Research Fellowship (JRF) ne kiwei pat ki Fellowship.
“Ngi kyntu ia ka sorkar ba kan tuklar da kaba ia kren bad ka sorkar pdeng ban pyllait ia kane” ong u Education Secretary ka KSU u samla Donald V Thabah hadien ka jingialang jong katei ka seng bad u Commissioner & Secretary in-charge Education u bah DP Wahlang mynta ka sngi hat majai. Utei u nongialam ka KSU u la ong ba dang shen ka sorkar pdeng ka la weng ia katei ka jingeh kaba ki samla pule ka Assam ki ia kynduh hadien ka jingiakren jong u myntri rangbah ka Assam u Sarbananda Sonowal.
U samla Thabah u la ong ba la dawa na ka sorkar ba kan tuklar namarba kiba bun kiba ngat ha katei ki dei ki hajar ngut ki samla pule na ka skulbah NEHU nalor kiwei pat. U la ong ba ka KSU kan ai ruh da ka jingthoh sha u myntri sorkar pdeng uba peit ia ka tnad MHRD u Prakash Javadekar, u ban sa wan shen ha nongbah Shillong ha ka 20 tarik u Nailur. Ha kaba ia dei pat bad ka Post Matric Scholarship u la pyntip ba u Commissioner and Secretary u la iathuh ba ka sorkar ka la pynmih jingpynbna ban pyllait ia ki samla pule na u Aadhaar nombar.