Pur sted ka khubor Hamsaia ba ‘pakhang shnong’

Shillong,23 Risaw:
Ka khubor hamsaia halor ka pakhang shnong ka la pur sted bha mynta ka sngi, ym tang ha nongbah Shillong, hynrei wat sha ki jaka nongkyndong ruh ha kaba ki paidbah ki la kulmar khlieh ka wad jingtip la ka don ne-em ka pakhang shnong, wat la ym pat shym la thoh ha ki kot khubor ba kan don ka pakhang shnong, hynrei katei ka hamsaia ka la pynartatien hi ia u paidbah khamtam ha kine ki sngi ba jur ki jingiakhih. Kaba lyngngoh halor katei ka hamsaia pakhang shnong ka dei hadien ba ki paidbah da ki bun ngut ki la phone sha u nongthohkhubor ban kylli thikna ia ka pakhang shnong, bad kane ka juh ka jingkylli ka la mih ruh ha ki lynti iaid ha kaba ki paidbah ki la wan ban kylli , kumjuh ruh ha kaba ki dukan sha ka mih ka jingartatien ha ki, la kin pynkhreh ne em ka shet ka tiew na ka bynta ka lashai. Haba u nongthoh khubor ula pyrshang ban kylli na ki mano ba la ai jingtip, ki riew paidbah, kim lah satia ban jubab.