Pur ki hamsaïa ba u VP ka AITC, u kwah pynïasoh sha ka NPP

Shillong:Ka lyer Ilekshon MP Lok Sabha 2024 ka la sdang beh mynta hapoh ka Jylla, kaba lah ruh ban sakhi ïa ki jingïabujli uniform jong ki nongïalam saiñ pyrthei.

Ka khubor ham saïa, ka la mih mynta ba u Vice President (VP) ka All India Trinamool Congress (AITC) bad MLA barim ka Umroi Bah George B Lyngdoh, ula don jingthmu ban leit ïasoh noh sha ka National People’s Party (NPP) kaba synshar mynta ïa ka Jylla, ha kine ki khyndiat sngi ban wan.

Ym tang u Bah George, kila don ruh ki kyrtong ba thmu mih aireng ha kane ka ilekshon ka ban sa long hadien 6-7 bnai, kiba la ïakren mynta bad ki seng saiñ pyrthei bapher bapher, ban pan ticket bad ban leit ïasoh.
Ka khubor ka ïathuh ba une u MLA barim ka Umroi u lah ban ïoh ïa ka ticket jong ka NPP ban aireng na Shillong Parliamentary seat ha ka ilekshon Lok Sabha 2024 ban ïakhun pyrshah ïa u MP ba mynta bad President ka MPCC u Bah Vincent H Pala.

Wat la ka AITC bad ka NPP, kim pat pynpaw satia ïa u kyrtong ba kin sei ha kane ka ilekshon hynrei ka khubor ba ïajan bad ka NPP ka pyntip ba ki Nongïalam ka NPP kila ïakren na ka por sha ka por bad une u MLA barim ka Umroi.
Ka khubor ka ïathuh ruh ba u Bah George u lah ban pynbna shen ïa ka jingiehnohkam na ka AITC ka ban plie lynti ïa ka jingleit ïasoh sha ka NPP.

Namar ka khubor hamsaïa ka la pur, ka AITC haba ïohi ïa ka dak ka jingma, kala aiksai ruh ba u Bah George Lyngdoh u dei uba biang eh ban ïakhun ïa ka ilekshon Lok Sabha ban wan.
U President ka AITC Meghalaya bad MLA ka Nongthymmai Bah Charles Pyngrope, u la pynpaw ïa ka jingai jingkyrshan ïa u Vice President ka party u Bah George B Lyngdoh kum u kyrtong ban ïakhun na Shillong Lok Sabha seat.

Lada kane ka khubor hamsaïa ka dei kaba shisha, ka NPP mynta kan don hapdeng ka jingeh ban jied ïa u kyrtong hapdeng ki arngut ki MLA barim kata hapdeng u Bah Himalaya M Shangpliang uba la wan pynïasoh shen bad u Bah George B Lyngdoh.
Ka MP na Tura ka Agatha Sangma kan mih aireng biang ban pynneh ïa ka jinglong Nongmihkhmat sha Lok Sabha na Tura Constituency ha kane ka ilekshon ban wan.