Ka jingpynbna jylla ka sorkar India ia ka Telangana, ka la pynmih sa shibun bah ki jingiakhih kiba jur ha kylleng ka India, ha kaba la iohi, ia ki jingdawa jylla bapher ha Assam, nangta sa ka jingiakhih ki Gorkha ha Darjeeling, na bynta ka Jylla Gorkhaland, nangta ka Koch Rajbongshis, kaba dawa jylla Kamata pur, ki Karbi ruh ki la dawa jylla lajong bad namar kitei ki jingdawa jylla ki la pynbna da ka jingiakhih bad ka pakhang shnong kaba ki la buh ha ki jong ki jong ki kynta bad ki sngi.
Mynta pat kane ka jingdawa jyla ka la pur sa ha ka jylla Meghalaya ha kaba ka la mih sa ka Garo Hills State Movement Committee (GHSMC) kaba la dawa jylla Garo land.
Ka GHSMC ka dei ka kynhun kaba kynthup ia ka Garo National Council Political party, ka All India Garo Union, ka Tura Government College Students’ Union bad ka A’chik Students Welfare Association (ASWA) kaba kynthup ruh ia baroh ki khynnah pule jong ki kolej ha Garo. Katei ka kynhun ka la pynbna ba kan pynlong ia ka pakhang shnong ha ka 8 tarik mynta u bnai ban dawa jylla Garoland.
“Lada ka sorkar ka lah ban ai jylla ia ka Telangana na ka bynta ki briew kiba kren Telegu, balei ym lah ban ai jylla ia ki Garo, ka jingdawa jylla jong ngi ka dei kaba hap hapoh ka State Linguistic Act of 1965 kaba shah ia ki briew ban pan la ka jong ka jylla kaba ki dei trai, ngi khlem tuh ia ka khyndew jong kiwei” ong u General Secretary ka GHSMC Augustine Marak.
Ka GHSMC ka la ioh jingbit ruh na u Deputy Commissioner ban pynlong iaka jingiashong kyllain myngngor ha Tura ha ka 6 bad 7 tarik mynta u bnai.
Lah ban ong ba ka jingpynbna jylla Telangana ka la long kumba ai ding ia kiwei pat ki kynhun bad ki seng jong ki jylla bapher bapher ban mih madan ban dawa jylla da kaba pynlong ia ki pakhang shnong bapher bapher.
Phi don ban ong eiei?