Pulom ka pakhang shnong ka CSWO Ngi plie haba ia plie baroh baroh, ong ki trai dukan

Shillong, 28 Risaw:
Kiba bun ki dukan mynta ka sngi, ha ka por mynstep ki khang bad ka jingkhang ka long namar ka jingpynbna khot pakhang shnong da ka Civil Society Women Organisation (CSWO) ba la ialam da ka kong Irene Hujon.
Na ka liang jong ka CSWO ka la pynbna ia ka pakhang shnong ba 12 kynta mynta ka sngi ban pyrshah ia ka jingiap jong uwei u bar jylla u Vikash Nandwal uba la khlad noh na ka daw ka jingshah thang ha ka dukan jongu ha Motphran. Kumta kiba bun ki dukan hynne mynstep ki la khang.
“Ngi ruh ngi khang hynne mynstep, hynrei haba ngi iohi ia ki kali kiba iaid ba ieng bad kiba bun tylli ki dukan kiba plie ngi ruh ngi la plie lang noh” la ong uwei u trai dukan ha khyndailad haba kren ha u nongaikhubor mynta ka sngi.
Hynne ha ka por mynstep wat la ki don ki dukan kiba khang ha ki bynta jong ka Khyndailad, hynrei ki kali kim ki la iaid la ieng kumba ju long man ka por, kumta kane ka pakhang shnong jong ka CSWO (I) ka la pulom noh.
Ki la don shibun ki jingkynthoh lyngba ka tnad pathai khubor paidbah (facebook) halor kane ka pakhang shnong bad kiba bun hi ki la pynpaw lypa ia ka jingbym iahap bad ka jingbym kwah ban kohnguh ia kane ka pakhang shnong ba la khot pynlong da ka kong Irene Hujon.
Lah ban pynkynmaw hangne ba na ka liang jong ka Meghalaya Citizen Forum (MCF) ka seng ki bar jylla trai ri kiba la im la sah ha kane ka jylla da ki phew phew snem kiba im ja na ka jingkamai die dukan kum ha Khyndai Lad bad kumjuh ruh ha Iewduh ki la pynbna ba kim iadon bynta ei ei ruh em ba kino kino ki jingiakhih bad khamtam ka pakhang shnong ka ban long mynta ka sngi.