Pulom ka komiti ka HSPDP

Shilling, 21 Jymmang:
Ha ka 19 tarik u jymmang, ka HSPDP ka la lum ia ka jingialang ki Seng Sain Pyrthei ban ia donlang ha kawei ka kynhun, ban pyrkhat na ka bynta ki kam ba ia dei bad ki Rangbah Shnong bad ha katei ka jingialang la wan ban ia shim bynta saw tylli ki Seng Sain Pyrthei ba kynthup ia ka KHNAM, HSPDP, UDP bad NPP bad ha katei ka jingialang ki la rai ban thaw ia ka Co-Ordination Committee ha kaba ki dkhot jong ka kin dei ar ngut na kawei ka seng. La shim ruh ia ka rai ban khot jingialang biang ha ka 21 tarik u jymmang kaba dei mynta ka sngi ban iakren halor katei ka kam bad ban ia jied ruh ia u Chairman jong ka komiti.
Lah ban kdew ba hadien ba la wai ka jingialang kaba la long ha ka 19 tarik u jymmang la kylli na kitei ki saw seng hato kin dang don shuh kiwei pat ki party bym dei Congress ban wan ia snoh lang, la ioh jubab ba kin dang don bad la kylli biang hato la phah jingpyntip sha ki ruh, namarba ym shym la iohi ia ki ba kin donlang ha katei ka jingialang “La phah jingpyntip hynrei ym ha ka rukom kaba dei” ong u bah Ardent M Basaiawmoit, Vice President ka HSPDP.
Hynrei mynta ka sngi nalor kitei ki 4 seng la wan ruh ban shong jingialang da ka seng BJP bad ha katei ka jingialang ki la ong ba kim lah ban ia don bynta lang ha katei ka komiti naba kim shym la ioh shong ha ka jingialang ba nyngkong naba ym shym la pyntip biang por ia ki.
Ha ka jingialang ba la long mynta ka miet ha ingsah u bah Hopingstone Lyngdoh, President ka HSPDP la pynwai noh syndon ia katei ka kynhun ki seng sain pyrthei , naba kim mon ban thaw ia kata ka komiti. Ka UDP ka la phah da ka jingthoh ba kam treh ban ia don bynta namarba ka la don ka komiti ka sorkar kaba la ialam da u bah Lapang bad kumjuh ruh ka la don ka kynhun ki Rangbah Shnong ban ia khun na bynta ba ka sorkar ka dei ban mynjur noh ia ka VAB, hynrei kum ka seng sain pyrthei kan shu kyrshan bad buddien ia ka jingtreikam jong ki. Lah ban kdew ba u nongialam ka NPP u James Sangma uba la donlang ha ka jingialang ba nyngkong um shym la wan ha katei ka jingialang , hynrei u la phah da kiwei pat.
Lah ruh ban kdew ba ha katei ka jingialang ka UDP ka la dep phah da ka jingthoh ba kam iahap ban thaw komiti, hynrei ka la sei ruh ryngkat ki jingai jingmut katba kiwei pat ki Party ki la pan por ba kin hap ban da ia shong pyrkhat bha hapoh ka seng jong ki shuwa ban shim ia ka rai ban thaw ia katei ka komiti. Hynrei katkum ki tyllong khubor pat la ong ba ka jingthmu ban thaw komiti kam poi shuh shano shano ruh.