Pulom ka jingthmu pynphong sopti hima ia ki Daju

Shillong,18 Rymphang:
Mynta ka sngi ka dei ka sngi kaba ki paidbah ki la khmih lynti bad ki la kwah dik dik ba yn iohi noh ia ki Daju Iewduh ha ka riam sawbthuh jong ki, ha kaba ki don bun ruh ki paidbah kiba wan iew khnang tang ban iohi ia u Daju phong sopti hima, namar ba ia ka hukum ban sdang pynphong sopti hima mynta ka sngi la dep pynbna ha thanad ka hima Mylliem, ha kaba ym tang ki myntri Hima Mylliem bad ki EM, MDC ka KHADC kiba la don ha katei ka jingialang bad ki Daju, hynrei ka jingkhmih lynti jong u paidbah ka dei namar ia katei ka rai bad ka hukum ia ki Daju la pynbna syndon da u Khliehduh ka District Council u bah Adelbert Nongrum uba long u Chief Executive Member. Lah ban kdew ba ha katei ka jingialang la pynbna da kaba tyngeh ba baroh ki Daju ki dei ban biang shriak da ka sopti hima, naduh mynta ka sngi bad lada jia ba don na ki, ki bym phong; ki pulit syiem ryngkat ki pulit ka district council kin bat ia ki bad kin ym shah kitnong ha Iewduh. Hynrei mynta ka sngi la iohi pat ba baroh ki Daju Iewduh hai hai ki kitnong khlem sopti saw bthuh bad kim riej ia ka rai ba ka district council bad ka hima Mylliem ki la dep ban pynbna.
Ha ka por mynstep, ka hima Mylliem ka la don ka jingthmu ban leit bat bad ban ym ailad ia ki Daju ba kit jingkit khlem sopti hima bad ban bud beit ia ka hukum ba u CEM u la pynmih, hynrei kham hadien la iohi pat ba katei ka jingthmu kam poi shano shano ruh, naba ka hima Mylliem ka dang artatien ioh dang don sa kawei pat ka bor kaba kham khraw ban ia ka hukum jong ka district council lada jia ba mih huri hura ha Iewduh namar ka jingbat Daju. Kham sa shipor pat, ha ka jaka ban leit bat Daju ki myntri ka hima Mylliem, ki pulit syiem, bad ki Enforcement ka KHADC ki shu leit ban shu pynsngewthuh noh sha manla ki kudam bad ki mahajon kiba ai nong kit jingkit ba ki dei ban ym ai kit shuh sha ki Daju khlem sopti hima bad kumjuh ruh ki la leit ban pynsngewthuh biang ia ki Daju ba naduh lashai ka sngi ki dei ban kit jingkit noh ryngkat ka sopti saw bthuh bad lada jia ba kim kohnguh yn ym ailad shuh ia ki ban kit jingkit.