Nongstoiñ: Ka jingbym ia sngewthuh jingmut bad ka jingdon ar kynhun jong ki bor synshar ha ka thaiñ Langpih teng teng kala pynklumar jingmut ia kiba bun ki paidbah kiba pyrshang bad thmu ban leh ia ki kam ba bha na ka bynta ka shong suk shong saiñ jong ki paidbah nongshong shnong ka thaiñ Langpih kaba dei ruh ka thaiñ kaba jur bha ka jingiajia pud hapdeng ka Meghalaya bad Assam.
Ia kane la sakhi myn hynnin ka sngi ka 8 tarik u Naiwieng katba ki nongialam jong ka Seng HNYF kiba na West Khasi hills, na Mawshynrut bad kumjuh ki nongialam na Sengkmie ki dang thmu ban pynlong ia ka jingiakynduh lang bad ki paidbah nongshong shnong ka thaiñ Langpih hapoh ka ophis u Syiem ka Hima Nongmynsaw kaba don ha Ïew Langpih, hynrei kyndit kynsan kynsan ki briew jong ka Raid Mynsaw kila wan ban phah sangeh jubor ia katei ka jingthmu pynlong jingialang jong ka Seng HNYF da kaba kila kam ba ka Raid Mynsaw kam shymla ioh jingtip halor katei ka jingthmu pynlong jingialang ka jong ki.
Ha kaba iadei bad katei ka jingshah pynsangeh jubor ban pynlong jingialang na ka liang jong ki nongialam ka Seng HYYF kila pyrshang ruh ban iakren sngewthuh ia ka jingthmu ka jong ki kata baan sngap ia ki jingeh jong ki paidbah kiba sah ha katei ka thaiñ namar kila iaid ia kane ka kam ha jan baroh ki shnong khappud kiab don hapoh ka Jylla Meghalaya hynrei wat hadien bala pyrshang ban iakren sngewthuh na ka liang jong u bah Hindro Samakha u bala kam ialade kum u Chairman ka riad Mynsaw bad ka kynhun ka jong u kim shymla sngap satia bad kila hukum ia kitei ki nongialam jong ka Seng ba kin mih noh shi syndon na katei ka jaka.
Haba iakren bad ki nongthoh khubor u bah Hindro Samakha u la ong ba ka daw ba kim shah ia kitei ki Seng ban pynlong ia ka jingialang, ka dei namar ba kim shym la pyntip sha ki ha shwa ba kin pynlong ia ka jingialang ha katei ka thaiñ da kaba u la pynksan ruh ia ki nia da kaba ong ba khyndiat snem mynshwa ka la don ka jingialang jong ka Border Forum kaba dei ka kynhun ka jong ki kila pynlong jingialang ha Langpih, hynrei na ka liang jong u Acting Syiem ka Hima Nongmynsaw u la ujor da ka ejahar ia ki dkhot ka border Forum kaba la pynlong ruh ia ki dkhot ka Forum ban shah khot hajir sah haduh mynta la 1 snem tam hapoh ka iing kashari ha Distirct Court.
Shuh shuh u bah Samakha u la ong ruh ba dei naduh katei hi kapor kala mih ka hukum na u DC ka WKHD bala bthah ba lada don kano kano ka kynja jingialang kaba la palat ia ka 10 haduh 15 ngut ka jingdon briew kila dei ban ioh ia ka jingbit na ka shnong nangta na ka Hima na ka Raid bad na u DC lem kumta yn nym lah ban pynlong ia ki jingialang.
Katba na ka liang jong bah Sandon K Blah General Secretary ka HNYF Sengkmie haba iakren bad ki nongthoh khubor u la ong ba ka jingthmu jong ka Seng ban wan sha Langpih ka long ban buddien bad ban sngap ia ki jingeh jong ki paidbah kiba sah ha ki thaiñ khappud bad ka jylla Assam khnang ba ka Seng kan ioh ban wad ia ki lad ki lynti ban pynpoi sha ka bynta ban pynbor ia ki ar sorkar ba kin ia pynbeit noh ia u pud u sam namar ka jingbymlah jong ki ar tylli ki sorkar ban pynbeit ia u pud u sam haduh mynta kala buh jingeh ia ki paidbah.
Ha kaba iadei bad ka jingbym shah jong ka Raid Mynsaw ban pynlong jingialang na ka liang jong kitei ki nongialam ka Seng kim treh ban kren eiei namar ki la ong ba kadei ka kam ka jong ki bad kum ka Seng kim don jingtip eiei, halor kata ka jingdon jong ki ar kynhun hapoh katei ka thaiñ. Ha kaba iadei pat bad ka jingkynnoh ba kim shymla pan jingbit na ka liang jong u Bah B. Marbaniang President ka HNYF WKHD u la ong ba ka Seng kala dep ban phah ia ka jingpyntip sha ki bor jong ka Hima Nongmynsaw Syiemship ia kaba u la pyntikan ruh ba kane ka Hima kala ioh pdiang ia ka jingpyntip ka jong ki.
Phi don ban ong eiei?