|
Shillong: Kumba da ki spah ngut eiei ki longkmie ka Meghalaya Pradesh Mahila Congress (MPMC) kim shym la ioh lad ban iaid kjat na ophis ka Congress na Khyndai Lad sha ophis ka BJP sha Bivar Road ban pynpaw ka jingpyrshah ia ka Citizenship Amendment Bill 2016 ba la wan rah da ka BJP ba la pdiang ka Lok Rabha dang shen. Kane ka jingpulom ban iaid kjat sha ophis ka BJP, ka dei bym ioh jingbit na ka bor ka synshar district ka East Khasi Hills kaba pynjari kyndon 144 CrPc bad namar kane, kila hap ban shu tawiar noh tang ia ka thain Khyndai Lad bad wan phai biang sha Congress Bhavan.
Ha kane ka jingiaid kjat ki longkmie lah iohi ba ym don MLA ne MDC kiba wan ban synran lang lait noh tang katto katne ngut ki rangbah kiba dei ki dkhot ka seng. Shwa ban iaid kjat, la ioh ia ka jingkren na u Bah Auguster Jyrwa, uba pynrem jur ia kane ka jingwanrah ka BJP ia kane ka Bill kaban pynjah klep ia ki rit paid riewlum ka Meghalaya bad ka dong Mihngi baroh kawei. Hadien ba la wan phai na ka jingiaid ka President ka MPMC ka Kong Joplyn Scott Shylla kala ong ba ka jingpyrshah ka long ban pyrshah ia ka Citizenship Amendment Bill 2016 namar ba lada ai lad ia ki briew ban wan na Bangladesh, Pakistan bad Afghanistan kan pynjah klep ia ki trai shnong ka jylla kynthup ia ki Khasi bad Jaintia kiba don 14 lak ngut eiei. “Lada ki wan tang 5 lak ruh ngi lah jah lut. Kumno ngin ai kam ia kiba nabar tang ialade ruh ngim dap”, kala ong bad bynrap, “Hato uta u Bangladesh, Pakistan bad Afghanistan kin ai jaka ia ngi”. Kala ong ba kane ka jingiakhih kan pynsngew sha ka shkor ka sorkar pdeng. Ka la ong ba kane ka sorkar ha kane ka jylla ka dei ban pyrshah da kaba iapra noh bad ka BJP. Ka president ka MPMC ka la pynpaw ia ka jingbym sngew iahap ia ka jingkren ka MP ka Congress na Silchar ka Sushmita Dev kaba kyrshan ia kane ka Bill. “Ngim iahap ia ka jingkyrshan jong ka (Sushmita Dev) ia kane ka Bill bad ngin iakhun beit haduh ba ka sorkar pdeng kan pynsangeh ia ka”, ka la ong. |
