Pulom ka jingialang ktem shipai ha Umchong, ba mih ka jing pyrshah

Shillong, 21 Jylliew:
Ka jingialang ban pynsngew paidbah na ka bynta ban thaw ktem shipai ha ka shnong Umchong ka la pulom noh namar ka jingpyrshah kaba jur na ki nongshong shnong katei ka shnong ryngkat ki khynnah skul. Katei ka jingialang ka dei kaba la khot da u Deputy Commissioner ka East Jaintia Hills na ka bynta ban pynsngew paidbah ban thaw ia ka ktem shipai ha katei ka shnong.
Ka la don ka jingkynnoh ba ka ophis u DC ka la kular ban ai jaka ia kishipai BSF haduh 75 akar ba kin ioh thaw ktem ha ka jaka kaba don ha Umkyrdeiñ Wah Sarang jong ka shnong Umchong bad ia katei ka kam la kynnoh ba ka la don ka jingiasngewthuh jingmut hapdeng ki shipai , ka ophis u DC ryngkat ki 8 ngut ki Rangbah shnong katei ka thaiñ ba kynthup ia ka shnong Suchen rim, Suchen Mulieh,Suchen Dhana, Suchen Lumiaraiñ, Iap mala,Wah Sarang, Deiñslalu bad Lumshken.
Ki nong shong shnong jong ka Umshong kim pdiang ia kane namar ba ki ong ba ki ne ki nong ialam shnong jong ki 8 shnong ki leh ia kane khlem da ioh ka jingmynjur na ki paid nongshong. Ki paidbah ki la pynpaw ia ka jingpyrshah jong ki da kaba rah lama iong bad pyrta ba ki pyrshah ia ki BSF bad ki larah ia ki jingthoh pla kad kiba thoh pyrshah ia ki 8 ngut ki Rangbah shnong kiba ai lad ia ka sorkar ban ai jaka sha ki shipai.
Katei ka jingialang ka la pulom noh namar ka jingpynthud ki paidbah ,ka daw ba kila pynsngew halor ka jingpyrshah jong ki ka long ba ka jingwan ki shipai BSf kan ktah ia ka repka riang jong ki bad kan long ruh ka jingtieng jingsmiej khamtam ia ki kynthei khynnah ha katei ka thaiñ.