Shillong: Ka jingthmu ban pynlong dorbar Shnong ka la pulom biang ha ka shnong Shella hadien ba ki paidbah ki la mih madan ban pyrshah sa shisien biang ia katei ka jingthmu ban pynlong dorbar. Kham mynshuwa ha u nailar mynta u snem ka la don ka jingkhot Dorbar Shnong ha ka shnong Shella hynrei ha katei ka por ym shym la lah ban pynlong namar ba ki la mih kynthei bad shynrang ban pyrshah bad kane ka la pynlong ia ki bor ba dei peit ka Sohra Civil Sub-Division ban pynjari da ka Section 144 CrPC ban ym shah ia ki paidbah ban ialum lymbung. Ha katei ka por ki paidbah kynthei bad shynrang ki la khang lynti na phyllaw ïng Dorbar ban ym ailad ban pynlong Dorbar bad ki bor jong ka Sohra Civil Sub-Division ki la hap ban pynsangeh noh shuwa ha katei ka sngi.
Sa shisien biang la khot Dorbar mynhynnin ka sngi ka 17 tarik u nohprah hynrei kane ka Dorbar ruh ka la pulom naba ki la ia mih biang kynthei bad shynrang ban ieng pyrshah. Ka daw ba ki paidbah kim shym la shah ban pynlong Dorbar ka dei namarba ki ong ba ka dei ka Dorbar kaba la khot da u Assistant Secretary u bah John Stelin Youroi bad ki la ong ba katkum ka riti ka dustur ia ka dorbar Shnong Shella dei ban khot beit da u Secretary uba pura ym u Assistant Secretary bad ia kane la ju leh naduh ki por kulong kumah. Ki paidbah ki la pynsawa jam ia ka sur ba kin dang iai ieng pyrshah beit lada ia ka dorbar yn dang khot da u Assistant Secretary. Ki paidbah ki la kynnoh ba ka dei ka jinglehbor jong ki 14 ngut ki riew rangbah halor katei ka jingthmu pynlong Dorbar, ha katei ka sngi la wan poi ruh ki majistor na Sohra ryngkat u SDPO ryngkat ki pulit kiba la pynkhreh ban lait na kano kano ka jingkulmar.