Pulit pyrshah MLA

Bah Monarch Shabong

Ka jing ia tyngkhuh jong ki pulit pyrshah ia ki MLA, ka long kaba i tynnad ban peit ha kine ki sngi bad ka daw, ka long namar ba ki don ia la ki jong ki nia ban pynksan kawei ka liang ia kawei pat bad katei ka dei halor ka daw jong ka jingtah iit iong bad ka jing ia pyni bor hapdeng u pulit bad U MLA ha Motphran.

Haba sngapthuh na ka jing iakren, kaba iaid mynta, ka pyni ba ka ishu kam dei shuh sha ka tah iit iong, hynrei ka paw noh pynban, ba ka dei ka jingleh meng jong u pulit, uba iakren bad U MLA, ha kaba ka la mih ka jing ia bun ktien kaba jur.

Lada ngi shim na katei ka liang, ngi hap ban pdiang ba ki pulit jong ka nongbah Shillong, la imat, kumba ki duna shibun ka jingshah hikai, namar ba ngi ju iohi, ha kiba bun ki khep, ba ki don ki riew paidbah, kiba shah shoh ha ki pulit bad dang shen, ngi kynmaw ia uwei u nongrwai, uba shah ktah kti ha uwei u heh pulit.

Na kaei kaba ngi iohi kum ki riew paidbah, ka long ba haba la kren u pulit, ym bit shuh ban pynphai ktien bad ka long beit ba hap kohnguh lane shah sangoh lane shah sei slip ejahar bad katei ka dei ka jingleh kaba mutlop haduh katta katta, namar ba u pulit, u trei ia ka kam kaba hap ban iakren bad u paidbah, u hap ban peit ia ka bit ka biang jong ki kali bad lada ym dei ba don paidbah lane ym don kali, hangta hi ruh ym don pulit satia bad haba lap ba ki don kiba kren tam lane kiba leh khlem akor, u pulit um lait, na kaba iada ia la ka jong ka hok bad un hap ban ujor sha ki bor kiba dei ban tohkit halor kata, hynrei lada ula leh hi lut nadong shadong, ka pyni ba ula bat ia ka ain ha ka bor jongu shimet.
Halor katei ka phang tah iit iong, lada U MLA u kren beit tang shaphang ka iit iong, kumta ka don kawei pat ka mat, kaba hap ban ia khyllie ia ki kot ki sla, kiba don jingiadei bad katei ka ain; hynrei lada u kren shaphang ka jingkren khor bad khlem akor, hangto u jop U MLA, namar ba kumno u shakri jong ka sorkar, un kham halor ialade ia u nongmih khmat paidbah bad la iohi, ba ha kane ka khep kaba mynta, U MLA, u iaid halor katei ka phang.
Ka jing ia tyngkhuh jong ki pulit bad ki MLA, khlem pep, ka dei kawei ka course kaba donkam shibun, ba nangne shakhmat kumno ki pulit, ki dei ban nang ban iadei bad ki paidbah, namar ba lada ka ain ka la beit lut, kumta ym donkam briew shuh ban trei!!