Shillong:Ka phlim ‘Ka Juk’ kaba dang ïaid ban pyni hapoh Bijou Cinema Hall Shillong, ka long kawei na ki phlim Khasi kaba la kham paw bha, wat la katei ka phlim ka dei ban sangeh noh ka jingpyni, hynrei na ka daw ka jingïabeh thong bad tur puk jong ki paidbah kiba kwah peit ïa katei ka phlim, la hap ban bteng biang ïa ka jingpyni.
Ha kine ki sngi kiba bun ki paidbah kwah peit phlim ki la ïa tynruh ban phrung la ki kti ban ïoh thied tiket jong katei ka phlim.
Kumba long mynta haduh kane ka sngi U Blei, ka 17 tarik mynta u bnai ka lynti ïaid ha Khyndailad ne police bazar ka la dap smam da ki paidbah kiba kwah peit phlim.
La ïohi ba ka jingïatynruh kiba kwah ne kiba ieid ban peit phlim Khasi ka la jubor bha ha kane ka sngi ha kaba la ïohi ba wat ka lynti ban ïaid ki briew ruh ka la khapngiah da ki briew kiba ïeng ban kyndar ïa ka jingkhang ne chatter jong ka jingkhang ka Cinema Bijou ban dawa plie noh ïa ka jingkhang khnang ba kin ïoh ban rung bad peit noh ïa ka phlim.
Kane ka jingleh ki paidbah kwah peit phlim lah ban ong ba ha kawei ka liang kan ai mynsiem ïa ki nongshna phlim Khasi ba ki phlim kin nangkiew irat nangne shakhmat bad ha kajuh ka por pat lada ka ïailong kumne kan pynthut ruh ïa ka ïaid ka ïeng ki paidbah, kumta lah donkam ruh ïa ki bor badei peit ban shimkhia ha kaba ïadei bad kane ka bynta.
Lah ban ong ba kitei ki paidbah ne ki briew kiba kwah peit phlim kim duna shuh ïa ki spah ngut kiba la dawa bad pyrta shla ban plie noh ïa ka Cinema naba kwah peit palat ïa ka phlim ‘Ka Juk’.
Phi don ban ong eiei?