Nongpoh: Ki paidbah hapoh ka shnong Umsen, ka shnong khappud ha Ri Bhoi bad kaba hap hapoh Jirang C&RD Block, ki la kulmar jingmut hi thlim, kata ka dei hadien ba kiwei pat ki jaidbynriew (Nepali), kiba sahlang ha katei ka shnong, ki la thmu ban knieh noh ia ka kam synshar shnong hapoh katei ka shnong, kaba dei ruh ka shnong kaba ki Nepali, ki kham bun tnum iing haba ianujor bad ki Khasi.
Katei ka jingjia ka la jia hadien ka jingkhlad noh u Bah Paulus Warlarpih, uba la khlad noh ha ka 11 tarik u K’lyngkot u snem 2019, ha kaba naduh ba la khlad noh utei u Rangbah shnong, ki Nepali kiba sah ha katei ka jaka, ki la pyrshang ban leh khlieh ha ki kam pyniaid ia ka shnong, da ka jingthmu ban thung Rangbah shnong noh da u Nepali.
Haba batai halor katei kam, u samla John Warlarpih, Secretary shnong ka Umsen, u la iathuh, ba kitei ki Nepali kiba don kumba 30 tnum iing, ki la pyrshang ban leit kynshoit sha u Syiem ka Raid Marwet u Ken Syiem bad ban pan ia ka Sanad Rangbah Shnong, ha kaba wat na ka liang u Syiem, u la dep ban ai ia kata ka Sanad Rangbah Shnong sha u Gorjon Rongsal.
Shuh shuh, utei u Samla, u la iathuh ba ka shnong tang mar ia tip halor katei ka jingai Sanad sha u Nepali, na ka liang ka shnong ka la leit kynduh ia u Syiem, na ka bynta ban dawa pyndam noh ia katei ka Sanad, ha kaba u Syiem u la kular ban pyndam, hynrei haduh mynta mynne kam shem la don satia kano kano ka jingshimkhia.
Haba ki paidbah Khasi kim ioh jingshai shuh lano lano ruh bad sngew bitar halor ka jingioh Sanad Rangbah shnong u Nepali, ki la leit ban khang tala noh ia ka Iing Durbar ha katei ka shnong. Kumta haba kitei ki Nepali, ki la iohi ba ka Iing Durbar ka la shah Khang Tala, ki la leit ban kren ia kitei ki Khasi ba ki dei ban weng noh ia katei ka tala, hynrei haba ki Khasi kim ailad ia kata, kitei ki Nepali, ki la leit ban khang da kawei pat ka Tala ia katei ka Iing Durbar, kumta ka jingkhang Tala ia katei ka Iing Durbar mynta la 2 bnai, ka la wanrah jingeh pat ia ki paidbah hapoh ka shnong, bynrap utei u Secretary ka shnong Umsen.
Tang mar ia tip halor ka huri hura hapoh katei ka shnong, myn hynnin ka sngi ki nongialam ka HANM, Ri Bhoi distrik, lyngba u Bah Pateng Marsing, President, ki la leit ban jurip ia katei ka shnong bad kiba la pynrem jur halor katei ka jingthmu wan leh trai khlieh ki Nepali ha ka kam synshar khadar ha ka jylla Meghalaya.
Haba iadei bad katei ka jingai Sanad Rangbah shnong sha u Nepali, na ka liang ka seng ka pynpaw ia ka jingsngewkhia kaba jur bad ka jinglyngngoh kaba khraw, namar kat u Syiem uba tip ia ka riti ka dustur pyniaid shnong, hynrei u la leit ban ai Sanad pynban sha u Nepali, kumta ka seng ka dawa ia u Syiem ka Raid Marwet, ba u dei ban pynbeit noh mardor halor katei ka kam, khnang ban lait na kino kino ki huri hura hadien habud.
Phi don ban ong eiei?