Pra phum ka UDP ha Pynursla, phet 6 ngut ki nongialam 60ngut

Shillong, 28 ïaiong:
Ka CEC ka UDP ka dang shu pyni ia ka dak or pait, hynrei ha Pynursla Circle katei ka seng ka la pra syndon phum ha kaba la don haduh 6 ngut ki nongialam rangbah jong ka Circle kiba la phet seng noh mynta ka sngi bad tang mar ia phet kitei ki la rah lang ruh haduh 60 ngut ki dkhot jong katei ka seng. Ia katei ka rai ban phet seng la shim mynta ka sngi ha ka jingialang kaba la long ha madan Urksew -Pynursla.
Ki 6 ngut ki nongialam rangbah jong ka UDP Pynursla Circle kiba la phet seng noh ki long u Adviser u bah Samuel Khongbuh, u Secretary bah Tarni Khonglam, ar ngut ki Vice President u bah Overness Masynting bad bah Kimsingh Khongkliam bad sa 2 ngut pat ki dkhot jong ka Executive Committee u bah Aming Khongngai bad ka kong Joy Khongwieng. Lem bad kitei ki nongialam ki la don sa 60 ngut ki nongkyrshan jong ka seng UDP kiba la mih lang. Ka kyrwoh khubor na u bah Tarni Khonglam ka la ong ba haduh mynta kim pat shim ia ka rai iano ban kyrshan ha ka elekshon MLA 2018 bad ki dang peit bniah ia ka jinglong jingman ka Politik ha Pynursla.
Kitei ki 6 ngut ki la kynnoh ba ka daw ka jingphet seng jong ki ka dei namar ka jingleh donbor ka President jong ka Circle ka kong Banalari Khongwar bad kumjuh ruh ki nongialam ba halor jong ka Party ha kaba kim shym la sngap ia ka sur uba bun balang. U bah Tarni u la ong ba ha ka jingialang kaba la long ha ka 11 tarik u rymphang ha Pynursla la donlang u President ka UDP East Khasi Hills u bah Titos W Chyne, u bah K.K Dkhar (uba kwah ban pan tiket na ka UDP) bad la donlang ruh ka kong Banalari bad baroh ki nongialam bad ki dkhot ka Circle. Ha katei ka sngi u bah Tarni u la ong ba la rai ban khot noh da ka aplikeshon ia kino kino ki kyrtong kiba kwah ban ia khun na ka seng UDP na ka bynta ka elekshon MLA 2018.
U la kynnoh ba ia katei ka rai la pynkheiñ da ka President ka kong Banalari Khongwar bad ka khlem khot aplikeshon satia.U la kynnoh ba ka President ka shu sngap jar jar da ka jingmut ba kin shu ai beit ha uno uno uba ki imon khlem da pynshai pat ia kiba bun balang.
“Iano ki mon ruh ngim tip, hynrei ki kwah beit ban shu leh buhrieh , ban shu ai beit ha u briew uba ki mon” ong u bah Tarni.
Watla kitei ki 6 ngut kiba la phet noh na ka UDP kim pat shym la pynbna iano kin kyrshan ha ka elekshon MLA 2018 hynrei ki lad khubor ki la iathuh ba kitei mynta ki don bad ka kong Grace mary Kharpuri-MDC ka Nongshken ka ban aireng na Pynursla konstitwensi ha u 2018. Ka UDP ruh ka la kynnoh ba kitei ki 6 ngut ki pynkheiñ ia ki kyndon ka Party da kaba leit ban kanbas sop sop sha manla ki shnong ia ka kong Grace.