Poi suk ka samla Khasi sha iing, ba sahkut ha Namsai, da ka jing iarap ka AAPSU

Shillong:Ka KSU myn hynnin ka sngi ka la phah ia shithi sngewnguh ia ka All Arunachal Pradesh Students’ Union (AAPSU) halor ka jingkloi jong kane ka seng ban iarap ia kawei ka samla Khasi ba pule bad sah hostel ha Namsai district jong ka Arunachal Pradesh.

Kane ka samla Khasi kaba pule sha AP, ka la shem shitom ban wanphai sha iing hadien ba ka hostel kaba sah ma ka, ka la khang noh. Ka daw ka long namar ka lockdown, kane ka samla ka jynjar ban ioh kali ban mih na Namsai.

Na ka liang jong u samla Reuben Najiar (Assistant Education Secretary), Raymond Kharjana (Education Secretary) bad u samla Donald V Thabah (General Secretary) ki la pyntip sha u Samla Tobom Dai uba dei u GS ka AAPSU bad u Tobom khlem pynslem u la pynbeit bad ki tnad treikam kato ka district ba don kata ka samla Khasi. Tang katto katne sngi ka AAPSU ka la lah ban iarap ia kane ka samla Khasi lyngba ka jingkyrpad ka KSU bad kane ka samla Khasi ka la poi suk sha iing.

Ka KSU ka ai khublei ia ka AAPSU, ba namar jong ka sa shiwat ka la lah ban iarap ia ki Khasi ba sahkut shabar kumba la jia ia kito ki 9 ngut ki Khasi kiba la shah ieh beiñ ha Bangalore.