Poi Secreteriat, ka shithi iakren iasuk ka HNLC

Shillong: U myntri kam pohing ka sorkar jylla u bah Lahkmen Rymbui, u la iathuh ba mynta ka sngi na ka liang jong ka sorkar jylla ka la ioh ban pdiang ia ka shithi na ka liang ka seng kieng atiar Hynniewtrep National Liberation Council (HNLC) ha ka ba ia dei bad ka jing tyrwa ban ia kren ia suk.

“Na ka liang ka sorkar jylla mynta ka sngi ka la ioh ban pdiang ia ka shithi ka ba la phah da ka sengkieng atiar HNLC ha ka ba ia dei bad ka jingtyrwa ban ia kren ia suk” la iathuh u bah Rymbui sha ki lad pathai khubor ha ka sngi palei.

U bah Rymbui u la iathuh ba kumba la pynpaw ia na ka liang U myntri rangbah ka jylla hynnin ka sngi ba ka seng ka donkam ban phah da ka shithi sha ka sorkar khnang ban lah ban pyniaid shakhmat ia ka ne ka bynta, kumta na ka liang ka HNLC mynta ka sngi ka la phah ia ka shithi sha u Myntri rangbah Conrad K Sangma bad ia ka copy ba la phah lang sha u u symbud Myntri rangbah bah Prestone Tynsong bad sha u Myntri kampohing u bah Lahkmen Rymbui .

Lah ban kdew hang ne ba na ka liang ka seng kieng atiar HNLC ka la pynpaw lyngba ki lad pathai khubor ba ka kwan ban wan shakhmat ban ia kren ia suk bad ka sorkar bad ruh kumjuh ka ia ka sorkar jylla ba kan thung ia u ksiang ban pyniaid shakhmat ia ka jingiakren hapdeng ka sorkar, ha kaba na ka liang u Myntri rangbah, hynnin ka sngi u la pdiang ia kane ka jingtyrwa jong ki.

U bah Rymbui u la ong ba ka jingwan sha khmat ban tyrwa ia ka jingiakren ia suk ka paw shai ba na ka liang jong ki dkhot jong ka seng ruh ki thrang ban iohi ia ka shong suk shong shngain ha kine ki Rilum jong ngi. U bah Lahkmen u la ong ba kumba na ka liang u Myntri rangbah u la dep ban kular ba tang shu ioh ia kane ka shithi, na ka liang ka sorkar kan rah ia kane ka mat sha ka sorkar kmie,kumta na ka liang jong ka sorkar jylla kan iaid sha khmat ban leh ia ka ba donkam. Halor ban thung ia u ksiang na ka liang u bah Rymbui u la iathuh ba ka jingjied ia u ksiang ka la iaid shakhmat ha kaba u kyrmen skhem ba kane ka kam kan iaid noh shakhmat na ka bynta ka shong suk shong shngain ha ka jylla baroh kawei .