Poi ki nong Meghalaya, na Israel sha Egypt

Shillong:Ki 27 ngut ki nong Meghalaya kiba sahkut ha Ri Israel, namar ka thma bad ka Palestine, ki la poi suk mynta sha Ri Egypt.

Ïa kane ka jing tip la pyntip da u Myntri Rangbah ka Jylla Conrad K Sangma ha ki rynsan social media jong u.
Myntri Rangbah ka Jylla ula thoh, “Kat kum ka jingtip ba khatduh bad lyngba ka jingtrei ba khlem shongthait ka Ministry of External Affairs (MEA) bad ka Indian Mission, ki 27 ngut ki nongshong shnong na Meghalaya, kiba sah kut ha ka jaka ïakynad ka Israel bad Palestine, kila jam suk sha shiliang u pud ka Ri Egypt,” ong ka khubor.

Kine ki 27 ngut ki dei kiba leit pilgrim sha kane ka Ri ba khuid (Holy land) bad ki kynthup ruh ïa u MP ka Rajya Sabha ka Jylla Dr WR Kharlukhi bad ki bahaïing jong u.
Hashuwa kane, u Myntri Rangbah ula pyntip ha ka sngi Saitjaiñ ba 27 ngut ki nongshong shnong ka Jylla, kiba la leit pilgrim sha Jerusalem, kila sahkut ha Bethlehem namar ka jingkhie ka thma hapdeng ka Israel bad ka Palestine.

Ula pyntip ba ula ïakren bad ka Ministry of External Affairs ban pynthikna ïa ka jingwan phai suk jong kine ki nongshong shnong ka Jylla.
Katkum ka khubor, ïa kine ki nong Meghalaya la leit shaw bad leit on da ka India Mission sha Egypt hynne ka sngi U Blei.

Palat 500 ngut ki briew kila ïap ha baroh arliang- ha Israel bad Palestine na ka jingïaleh thma kaba la sdang da ka jinghiar thma jong ki kynhun lehnoh Hamas ka Palestine ha ka step sngi Saitjaiñ.
U Myntri Rangbahduh ka Israel Netanyahu ula ong ba ka Ri kan jam ha ka lynti jong ka thma kaba shimpor bad kaba eh bha pyrshah ïa ki Hamas.

Ula bynrap, “Ngin wanrah biang ïa ka jingshngaiñ jong ki nongshong shnong ka Israel bad ngin jop ïa kane ka thma.”