Poi ki kynhun peitngor ia ka jingtrei kam ki skul ha Shillong

Shillong,22 Naiwieng:
Ka kynhun peitngor ban lap ia ka jingshisha ia ka jingtreikam ki skul ha ka jylla Meghalaya ka la wan poi ha nongbah Shillong mynta ka sngi. Katei ka kynhun ba la ialam da u Rao Virendar Singh ka kynthup ia bun ngut ki MP ka la wan ha nongbah Shillong ban wad jingtip ia ki rukom treikam ka tnad pule puthi ha ka jylla. Ka jingthmu ba kongsan jong katei ka kynhun haba ka wan sha Shillong ka long ban lap ia ki jingshisha la ki skul kiba hap hapoh ka CBSE ki bud ryntih ne-em katkum ki Syllabus ba la pruid dak da ka Central board.
Katei ka kynhun ba la ialam da u Singh ha ka jingwan jurip jong ka ia ka long ka man ka tnad pule ha nongbah ka la leit ban jngoh ia ka B.K Bajoria College bad ka Assam Public School, ha kaba katei ka kynhun ka la ioh ruh ban ia kren bad ia phylliew jingmut bad ki lkhynnah pule kitei ki jaka pule. Katei ka kynhun kam pat reh ban pynpaw aiu ka lap na katei ka jingwan jurip hynrei la ong ba ia ka rai halor ka jinglap bad ka jingshem jong ka ia ki rukom treikam yn phah sha ka ing Dorbara Bah ka ri ka Parliament. Katei ka kynhun hadien ba ka la dep ia ka jingjurip ha ka jylla Meghalaya kan sa leit ruh ban jngoh sa ia ka jylla Assam.