Poi khubor sha ki heh BJP, ia ka Administrator Congress

Shillong, 08 Iaiong:
Ka jingkyntait u Lat ka jylla u Keshari Nath Tripathi ban pdiang ia ka rai ka sorkar jylla ban pynjari synshar Administrator ha KHADC, ka la phah ia ka khubor jing maham ia ka sorkar jylla kaba ialam ka Congress.
Katkum ka khubor ba la iohlum, la iathuh ba ka rai jong ka sorkar jylla ban pynjari ia ka synshar administrator ha KHADC, ka la poi sha ki tyndong shkor jong ki heh BJP ha Delhi ki bym sngew tynnad ia kane ka rai jong ka sorkar jylla ba la ialam da ka Congress ban pynjari synshar administrator.
U Rupang u la ioh ban twad jingtip na ki thymmai khubor, la iathuh ba ka daw ka jingkyntait jong u Lat ka jylla ban pdiang ia ka rai jong ka sorkar jylla ban pynjari synshar administrator ha KHADC, ka dei namar ba ki heh ka BJP ki la phah ia ka khubor sha u Lat ba un bishar bniah ia kane ka kam shwa ba un shim ia ka rai.
“Ki nongialam ba hakhlieh ka BJP na New Delhi, ki la bthah ia u Lat ka jylla ba un pyntreikam bad ban bud katkum ki ain, ym ban shu kohnguh ia ka bym biang”, la ong ka thymmei khubor kaba iajan bad ka BJP. Ha ka jingshisha ka sorkar jylla ka la dep rai kham mynshwa ban pynjari administrator ha KHADC hynrei u Lat ka jylla u la kyntait bad u la bthah ia ka sorkar ba kan bishar biang ia kane ka rai. Hynrei hadien, ka sorkar jylla ka la phah biang sha u Lat da kaba pynskhem ia ka rai ban pynjari synshar administrator ha KHADC. Hynrei haduh kine ki sngi, u Lat um pat ai ia kano kano ka rai halor kane ka kam.
Ha kawei ka liang ka ARPA kaba don 16 ngut ki MDC ba kyrshan hapoh ka jingialam u bah Metbah Lyngdoh ka la pan sngi ban leit iakynduh biang ia u Lat ka jylla ban pyni ia ka jingbun paid bad ban dawa na u ba un bthah ban khot noh ia ka dorbar kyrpang na ka bynta ban ioh ban jied ia u CEM ba thymmai hadien ba u bah Adelbert  Nongrum u la iehnoh ban plie lynti ia u Bah Lyngdoh ban shimti ia kane ka kam.