Poi ka met iap u Major ha Madanrting ba shah siat ha ka NSCN

Shillong, 7 Jylliew:
Ka met iap jong u Major David Manlun 31 snem ka rta uba sah ha Madanrting Shillong ka la wan poi mynta ka janmiet ha iingsah jongu hadien ba u la khlad noh hadien ba la shah siat ha ki lehnoh NSCN ha ka jingiakhun mynta ka step, ha khappud ka Myanmar bad Nagaland.
Ia ka met jong u Major Manlun la wanrah da ka helicopter ki shipai ha kaba kiba haiing hasem ki la iam paid dohnud.
U Major David Manlun u dei na ka Territorial Army Naga bad u la don ha ka kynhun shipai Assam Rifles. U dei u samla pule ka St Anthony’s School ha Shillong bad u la pyndep ia ka kyrdan pule na St Anthony’s College bad u dei uba la heh la san ha Shillong, wat la u dei na ka jaitbynriew Kuki jong ka Jylla Manipur. Ki khubor sngewlem ki la tuid ia kane ka jingkhlad kyndit une u heh shipai kynthup na ki bor pyniaid ka St Anthony’s College.U Major Manlun u dei u dkhot ka NCC jong ka St Anthonys College bad u dei uba la kwah ban trei kam shipai, naduh ba u dang khynnah.
Ki shipai, kiba la ioh khubor, halor ka jingiaid lynti jong ki ehrang National Socialist Council of Nagaland-Khaplang (NSCN-K) bad ki ehrang United Liberation Front of Asom-Independent (ULFA-I), ki la leit ban hiar thma ha kawei ka jaka, kaba don ha ka shnong Oting jong ka Mon District, kaba ia khappud hapdeng ka Nagaland bad ka Myanmar.
Nalor U Major David Manlum, ki don sa lai ngut kiwei pat ki shipai, kiba la mynsaw ha ka jingialeh bad ki don ruh 4ngut ki ehrang, kiba la iap ha katei ka jingialeh pyrshah mynta ka step, ong u heh duh ki pulit Nagaland, U LL Doungel.