Poi ka Dongmusa ka SAG ha Shillong

Shillong 20, K’lyngkot:   Ka Dongmusa ka lympung ialehkai 12th South Asian Games 2016 ka la poi ha Shillong mynta ka sngi hapdeng ka jinghap u slap hynrei ka bym shym la pynduh ia ka mynsiem shitrhem ki paidbah.
Ia ka Dongmusa la wanrah na Guwahati bad la aiti sha u  CEO ka South Asian Games (Shillong) u RK Sharma ha Mawiong Mawlai.
Ia ka jingpdiang ia ka Dongmusa la sakhi lang u Joint CEO Shillong, Secretary  ka Sports and Youth Affairs  Bah FR Kharkongor, u President ka Meghalaya State Olympic Association Bah John Kharshiing bad u Director ka Sports and Youth Affairs Bah FM Dopth.
La aiti ia ka dongmusa sha ar ngut ki nongialehkai ba paw ka jylla kynthup ka kong Linza Syiem  ka thei iakura bad u nongialehkai kynjatbol u Leikini Suting kiba rah ia ka Dongmusa shaduh nongbah Shillong ha ka kali ba don ka dur jong u Tikhor ka  12th South Asian Games 2016.
Ia ka dongmusa yn pyni paidbah ha ka Run for North East, ban khaweh lama da u Myntri Rangbah ka jylla u Mukul Sangma la sngi Palei. Ka MC Mary Kom, L Sarita Devi bad u Milind Soman kin iadon bynta ha kane ka sngi katba ki nongialehkai kynjatbol ka Shillong Lajong FC kin shim bynta ha ka mareh kai.