Poi Hospital naba shah tangon ha ka miet 31 tarik

Shillong, 4’lyngkot:
Ha ka miet 31 tarik ha ka por 11:30 baje eiei ka la don kawei ka jingjia ha kaba uwei u samla na ka shnong Diengrai , ka shnong kaba don hajan Tyllap u la shah tangon na khlieh da ki kynja tiar kiba nep bad la hap ban pynkit noh ia u sha Civil Hospital, Shillong namarba ym shym la lah ban sumar hapoh Ichamati CHC.
Utei u samla uba la shah tangon u dei uba la tip kyrteng kum u Jowel Ch Marak, 22 snem karta. Ha ka step kaba bud kata ha ka 1 tarik u kylla lyngkot ka kmie jong utei u samla ka Ranjo Ch Marak ka la ujor FIR ha ki pulit bad katkum ka FIR ka la ong ba u khun jong ka u la shah thom bor ha u Duparson A Sangma uba na katei hi ka shnong bad katei ka jingjia ka la jia katba u khun jong ka u dang leit ban thied jingthied na ka dukan jong u Duparson.
Hadien ba la ioh ia ka jingujor da ka FIR ki pulit ki la leit thwet ia u Duparson ha katei hi ka sngi hynrei kim lap shuh ia u namarba u la phet krad hynrei kham hadien kata ha ka 3 tarik mynta u bnai ki pulit ki la ioh kem ia u. Katba u Jowel pat mynta u dang don hapoh Civil Hospital ban shah sumar, ia kane la pyntip da u SDPO ka Sohra u bah Ian Onel Swer.