Shillong:Ka jingthep vote myn hynnin ka sngi ha ka elekshon ha Williamnagar, ka poi sha ka 78.82 percent bad la antad, ba kan lah ban kham kiew, hadien ba la ioh lum lut ia ka jingtip na baroh ki jaka thep vote.
Ka kurim jong U Jonathone Sangma, ka Krinila Marak, kaba iakhun na ka tiket NCP, ka dei kaba la leit dang step ban thep vote ialade.
Katei ka Constituency, ka don 58 tylli ki jaka thep vote, ha kaba ka Balsrigittim ha Williamnagar, ka don 1,273ngut ki nongthep vote bad ka dei kaba don ki nongthep vote kiba bun tam bad ka shnong Naregre, ka dei kaba rit tam, ha kaba ki don 83ngut ki nongthep vote. Ka jingthep vote, ka iaid beit iaid ryntih bad kam don kano kano ka jingthut. La iathuh ba ki don ar tylli ki mashin EVM, ki bym trei kam bha ha ka por mynstep, hynrei ia kitei la bujli noh da kiba bha bad ka jingthep vote, ka iaid beit iaid ryntih baroh shisngi.
Ki don 9ngut ki kandidet, kiba iakhun ha kane ka eleskhon, kaba la mihkhmat mynshwa da ka Deborah Marak na ka seng Congress. Ka jingniew vote kan long ha ka 1tarik Jymmang 2018.