Shillong: Ka jing khlad jong ki briew kiba bam ia u tit u ba long bih ha ka Shong Lamin West Jaintia Hills District ka la poi haduh 6 ngut, ha ka ba myn hynnin ka Marriaba Konglah 14 snem, ka la khlad noh ha jaka sumar ha NEIGRIHMS hospital.
Katba uwei pat u ba la shitom jur na ka jingbam ia u tit bih u ba la tip kyrteng u Armstrong Khonglah u la khlad noh ha ka sngi u Blei ba la dep.
La iathuh ruh ba kawei na kiba la lamih na Hospital, hadien ba ka la ioh jingkoit dangshen ka la shitom biang bad la pynkit noh ia ka sha Woodland Hospital.
Haduh 18 ngut ki briew kiba dei na ki 3 tylli ki longing na ka shnong Lamin ka ba hap ha West Jaintia Hills, ki la shitom jur hadien ba ki la bam ia u tit u ba long bih. Na kine ki 18 ngut, 6 ngut ki briew ki la duh ei ia la ka jingim.
Kiba la khlad na kane ka jingjia ki long U Katdilia Khonglah 26 snem ka rta,u bah Morison Dkhar 40 snem ka rta, ka Synran 16 snem ka rta bad ka Lapynshai Khonglah 28 snem ka rta.
Kum ban shu pynkynmaw ba kum ba 18 ngut ki briew, kiba na ki 3 tylli ki longing ki la kem pang noh, hadien ba ki la bam ia u tit bih u ba ki la kheit na khlaw ha ka 19 tarik u iaiong 2020 ha ka shong Lamin, kaba hap ha West Jaintia Hills district bad 6 ngut ki mynsiem kiba kordor ki la duh ei ha kane ka jingjia.
Na ka liang u myntri ka tnad pule puthi u Ma Lakmen Rymbui, mynta ka sngi u la phah ia ka khubor sngewlem, ia kine ki longing ki ba la ngat ha kane ka jingjia ba sngewsih.
Phi don ban ong eiei?