Poi 386 ngut kiba ai injek covid ha Ïewduh, 10% ki Khasi

Shillong:Kumba 386 ngut ki nongshong dukan hapoh Ïewduh, ba kynthup ruh ïa kiba die jingdie hapoh madan, ki la wan ban ai injek tika hapoh khlieh Ïewduh, hapoh thanat jong ki pulit jong U Syiem ka Hima Mylliem.

Lah ban pyn kynmaw ba kane ka jingai tika salonsar bad kyrpang ruh na ka bynta kiba shongdie jingdie ha Ïewduh bad kumjuh ruh kiba die jingdie hakhmat Motphran ka la sdang naduh ka sngi Balang, ka 16 tarik mynta u bnai bad kaba la ïai bteng haduh mynta ka sngi ha kaba katkum ka jingkheiñ haduh lai sngi mynta ka jingpoi kiba leit ai injek hapoh Ïewduh ka la jankot duna ïa ka shi hajar ngut.

Katkum ka jingïathuh jong ki bor pynïaid distrik ka East Khasi Hills bad kumjuh ki nongtrei ka tnat ka Koit ka Khiah la ong ba ha ka sngi Thohdieng kiba ai injek tika ki la poi haduh kumba 386 ngut.

Na ka liang ki bor pynïaid distrik ki la ïathuh ruh ba kane ka jingai tika hapoh Ïewduh kan dang ïai bteng bad ki kyntu ïa kiba die jingdie hapoh Ïewduh ban wan shakhmat ban ai injek tika khnang ban ïada ïalade bad kumjuh ruh ïa ki nongthied na ka jingpang khlam Coronavirus ne Covid 19 hynrei ki la pynpaw pat ba kim pynbor ïano ïano ruh ki bym kwah ne don ka mon sngewbha ban ai injek tika.
Ki la ïathuh ruh ba kumba long ha ka sngi Thohdieng malu mala na ki Khasi kiba la poi ban ïoh injek tika ki la long kumba 10% bad khambun dei hi ki bar jylla.