Pluh ka skul CP hapdeng ka jingiaid ka Audit

Shillong, 18 Rymphang:
Ha ka step 21 tarik u Kyllalyngkot mynta u snem ka la pynkyndit ia kiba bun balang khamtam ki nongshong shnong ka thaiñ Sohra naba ka jingjia ba sngewsih ka la wan jia ha ka skul ba la rim tam ha ka thaiñ shatei Lam Mihngi kata ka Cherra Presbyterian School kaba don ha Nongsawlia- kaba la kem ding noh bad ka ding ka bam duh ploiñ ia ki jingtei barim jong katei ka skul. Bun ki jingiakren ki la mih halor katei ka jingjia kaba ym lah ban tip na kaei ka daw hynrei kaba la shu ia antad lut baroh baroh ba ka lah ban dei na ka daw jong ka jingthud ki bording ilektrik.
Hapdeng kiba bun ki jingiakren kiba bun ban wad ia ka daw jong ka jingpluh ka skul CP kaba don ha Nongsawlia ka la mih ruh ka jingsuba sniew na ki paidbah ba ioh lehse katei ka jingjia ka dei pynban kaba la thmu khnang dano re dano naba ha ka por ba katei ka skul ka la pluh ka dei ruh ka por ba ka jingwad jingkheiñ kaba bniah shaphang katei ka skul lane ka Audit ka dang iaid shaid shaid bad katei ka jingsuba ka la mih ruh na ka daw ba la don kiba kynnoh ba ka rukom pyniaid ha katei ka skulki long thur mur.
Ban tip ia ka jingshisha bad ban lait na kitei ki jingpynkulmar jingmut ia kiba bun ki paidbah ka thaiñ Sohra ki la don katto katne ngut ki samla kiba kwah ban tip kaei ka ripod kaba mih na ka jingtohkit halor katei ka jingjia. Kitei ki samla kiba kynthup ia u M.Rynjah, F.Diengdoh, B.Khongphai bad P.Hujon ki la pan jingtip lyngba ka hok wad jingtip ne ka Right To Information ( RTI).
Katkum ka jingkwah jingtip jong ki kaba ki la pan jingtip na ka ophis u SDSEO ki la pan jingtip ia ka ripod kaba mih na ka jingtohkit ia ka jingpluh ka skul CP, ki la pan jingtip ruh ia ka ripod jong ka jingwad jingkheiñ ( Audit) kaba naduh u snem 2008 haduh u 2015. Kitei ki samla ki la kynnoh ruh ba kaba kham pynsuba sniew shuh shuh ka dei namarba hadien ba la jia ka jingpluh jong katei ka skul ki bor skul kim shym la ujor FIR sha ki pulit.
Shuh shuh la mih ki jingkynnoh ba katei ka skul kam ju pynbiang bha ia ka ja sngi ki khynnah skul ne kaba ki ong ka Mid-Day Meal bad halor kane ruh ki la pan jingtip lyngba ka RTI na ka ophis jong u SDSEO shaphang ka rukom pyntreikam ka skul CP ia ka Mid-Day Meal. Nalor kitei ki jingwad jingtip kitei ki samla ki la pan jingtip ruh na ka ophis u Block Development Officer (BDO) Shella –Bholaganj C&RD Block) ia ka jingioh jingiarap katei ka skul na ki MP Scheme ( Lok Sabha bad Rajya Sabha), na ki MLA Schemes bad kumjuh ruh na ki MDC Schemes.