Plie U President ka BJP ia ka jingpynkhuid Lum Jingthang

Shillong, 24 Iaiong:
U Bah Shibun Lyngdoh uba dei u nong aibuit ka  Sein Raij Tuber uba long ruh u President ka BJP Meghalaya u la plie ia ka jingpynkhuid Lum Jingthang kaba long mynta ka sngi u Blei ha Jaiaw ba pynlong da ka Lum Jingthang Committee Seng Khasi (Kmie).
Haba kren ha kane ka sngi, u Bah Shibun u la ong ba ka jingpynkhuid ka long shi bynta ka jingkoit jingkhiah bad ki sawdong sawkun ka mariang.
Na ka liang, u Bah Shibun u la ong ba kum u briew ba don ruh ha ka sain pyrthei, u kloi ban ai ia ka jingiarap ka jingkyrshan lada donkam.
U la ong ba ka bor jong ka sain pyrthei ka dei kaba khlain tam bad khlem ma ka, ka long kaba eh ban iakhun ia kiwei pat.
U la kyntu ba dei ban pynkhlain ia ka niam ka rukom ban iakhun hapdeng kiba bun ki jingeh ba ki la wan ban tynjuh ha ka jinglynti iaid.
Ha kane ka sngi, da ki spah ngut ki dkhot ka Seng Khasi naduh khynnah, samla, kynthei bad shynrang ryngkat ki  nongialam seng kmie kynthup u President Bah Bantei Rumnong, ki la iashim bynta lang ha kane ka jingpynkhuid ia ka lum jingthang.
Shwa ban sdang, la pynlong ia ka jingduwai phirat da ki riew tymmen riew san jong ka Seng.